Claude Mythos Threats: केंद्रीय अर्थमंत्री निर्मला सीतारामण यांनी गुरुवारी सार्वजनिक आणि खासगी क्षेत्रातील बँकांच्या प्रमुखांसोबत उच्चस्तरीय बैठक घेतली. या बैठकीत आर्टिफीशल इंटेलिजन्स (AI) मॉडेल Claude Mythos आणि त्यातून उद्भवू शकणाऱ्या सायबर सुरक्षा धोक्यांवर सविस्तर चर्चा करण्यात आली.
अर्थ मंत्रालयाने सोशल मीडिया प्लॅटफॉर्म ‘X’ वर दिलेल्या माहितीनुसार, Mythos मुळे निर्माण होणाऱ्या संभाव्य धोक्यांबाबत सर्व संबंधित घटकांना सावध करण्यात आले आहे. या AI मॉडेलमुळे मोठी सायबर जोखीम निर्माण होऊ शकते, त्यामुळे बँकांनी अधिक सतर्कता, तत्परता आणि परस्पर समन्वय वाढवण्याची गरज असल्याचे अधोरेखित करण्यात आले.
Claude Mythos म्हणजे काय?
Claude Mythos हे Anthropic या कंपनीने विकसित केलेले अत्याधुनिक AI मॉडेल आहे. कंपनीच्या दाव्यानुसार, हे मॉडेल सायबर सुरक्षेच्या दृष्टीने अत्यंत प्रगत असून, संगणक प्रणालींमधील सूक्ष्म त्रुटी शोधण्यात ते पारंगत आहे.
#WATCH | Following her meeting with heads of banks on AI risks, Union Finance Minister Nirmala Sitharaman says, "It has always been that the banks in India, because of greater digitisation happening, that we are adequately equipped to meet any challenges and risks. Now, because… pic.twitter.com/kTZ7AuSa94
— ANI (@ANI) April 24, 2026
विशेषतः, जुन्या ऑपरेटिंग सिस्टिम्स आणि वेब ब्राउझर्समध्ये दडलेल्या सुरक्षेतील त्रुटी शोधून काढण्याची क्षमता Mythos मध्ये आहे. 1990 च्या दशकात विकसित झालेल्या सॉफ्टवेअरमध्ये सुरक्षा बाबींना कमी महत्त्व दिल्यामुळे निर्माण झालेल्या त्रुटी ओळखण्यात हे मॉडेल प्रभावी ठरते.
सर्वसामान्यांसाठी प्रवेश मर्यादित
Anthropic ने या मॉडेलचा वापर सर्वसामान्यांसाठी खुला न ठेवता, केवळ निवडक सुमारे ४० कंपन्यांनाच प्रवेश दिला आहे. यामध्ये Amazon, Microsoft आणि Google यांचा समावेश आहे. कंपनीच्या मते, हे मॉडेल मोठ्या प्रमाणावर उपलब्ध केल्यास अत्याधुनिक हॅकिंग क्षमतांचा गैरवापर होण्याचा धोका वाढू शकतो.
संभाव्य धोके काय?
अहवालानुसार, काही अनधिकृत वापरकर्त्यांनी Mythos पर्यंत प्रवेश मिळवल्याची शक्यता व्यक्त करण्यात आली आहे. यामुळे सायबर हल्ल्यांचा धोका अधिक वाढू शकतो. सरकारने बँकांना सूचना दिली आहे की, कोणत्याही संशयास्पद हालचाली किंवा हल्ल्याच्या प्रयत्नांची माहिती तत्काळ इतर बँकांसोबत शेअर करावी. Nirmala Sitharaman यांनी स्पष्ट केले की, अशा AI मॉडेलचा वापर करून बँकांमधील निधी चोरी करणे किंवा ग्राहकांची वैयक्तिक माहिती चोरण्याचा प्रयत्न केला जाऊ शकतो.
आंतरराष्ट्रीय पातळीवरही चिंता
भारताबरोबरच अमेरिका देखील या तंत्रज्ञानावर लक्ष ठेवून आहे. अहवालांनुसार, अमेरिकन सरकारने वॉल स्ट्रीटवरील बँकांसोबत यासंदर्भात चर्चा सुरू केली आहे. तसेच White House विविध सरकारी यंत्रणांमध्ये सायबर सुरक्षा मजबूत करण्यासाठी या तंत्रज्ञानाचा वापर करण्याच्या विचारात आहे.