सांगली महापालिका प्रशासनाचे बजेट मंगळवारी स्थायीकडे, पहिल्याच सभेत दीड कोटीच्या कामांना मंजुरीचे विषय

सांगलीकरांना कोणत्या नव्या सुविधा मिळणार, याकडे साऱ्यांचे लक्ष

सांगली : महापालिकेत अडीच वर्षांची प्रशासकीय राजवट संपुष्टात येऊन लोकप्रतिनिधीची राजवट सुरू झाली आहे. महापौर, उपमहापौर, गटनेत्यांच्या निवडीनंतर स्थायी समितीही अस्तित्वात आली. आता स्थायी समितीच्या मंगळवार दि. १७ रोजी होणाऱ्या पहिल्याच सभेत आयुक्त सत्यम गांधी हे २०२६-२७ चे अंदाजपत्रक सादर करणार आहेत. यात सांगलीकरांना कोणत्या नव्या सुविधा मिळणार, याकडे साऱ्यांचे लक्ष लागले आहे. दरम्यान, या सभेत सुमारे दीड कोटीच्या कामांच्या मंजुरीचे विषयही अजेंड्यावर घेण्यात आले आहेत.

महापालिकेच्या स्थायी समितीची पहिली सभा मंगळवारी सभापती अतुल माने यांच्या अध्यक्षतेखाली होत आहे. या सभेच्या अजेंड्यावर यंदाच्या अंदाजपत्रकाचा विषय आहे. आयुक्त गांधी यांनी यंदाच्या अंदाजपत्रकावर अंतिम केला आहे. हे बजेट सुमारे ५० कोटी रुपये तुटीचे असण्याची शक्यता व्यक्त होत आहे.

त्यामुळे प्रशासनाकडून यंदाच्या अंदाजपत्रकात नव्या सुविधांना कितपत स्थान देण्यात आले आहे, याविषयी साशंकता आहे. याशिवाय घरपट्टी, पाणीपट्टीव्यतिरिक्त उत्पन्नाचे इतर स्त्रोत वाढविण्यावर प्रशासनाचा भर असल्याचे सांगण्यात येत आहे. स्थायी समितीकडून अभ्यास करून आपल्या शिफारशीसह मार्चच्या शेवटच्या आठवड्यात महासभेला बजेट सादर करण्यात येणार आहे.

हिराबाग वाॅटर वर्क्स येथील इमारतीच्या दुरुस्तीसाठी ३४ लाख ४६ हजार रुपयांची निविदा मागविण्यात आली होती. या कमी दराची २८ लाख २५ हजारांची निविदा मंजुरीचा विषय सभेच्या अजेंड्यावर घेण्यात आला आहे. याशिवाय मिरज शहरात विविध ठिकाणी दीपस्तंभ उभारण्याची ४९ लाख ९८० हजार व मिरजेतील वखार येथील पंपिंग स्टेशनमध्ये ट्रान्सफाॅर्मर व इतर कामांची ५५ लाख २७ हजार रुपयांच्या निविदेला मंजुरी देण्याच्या विषयावरही चर्चा होणार आहे.