नगरपरिषद, नगरपचांयतीच्या निवडणुकीसाठी मंगळवारी सार्वजनिक सुटी

- जिल्हाधिकारी जितेंद्र डुडी यांची माहिती

पुणे : नगरपरिषद व नगरपचांयतीच्या निवडणुकीत पात्र मतदारांना मतदान करता यावे याकरिता मंगळवारी (दि. २ डिसेंबर) सार्वजनिक सुटी जाहीर करण्यात आली आहे, अशी माहिती जिल्हाधिकारी तथा जिल्हा निवडणूक अधिकारी जितेंद्र डुडी यांनी दिली.

जिल्ह्यातील आळंदी, बारामती, भोर, चाकण, दौंड, फुरसुंगी-उरळी देवाची, इंदापूर, जेजुरी, जुन्नर, लोणावळा, माळेगाव बुद्रुक, मंचर, राजगुरुनगर, सासवड, शिरूर, तळेगाव दाभाडे आणि वडगाव या नगरपरिषद व नगरपचांयतीच्या मतदारसंघात सुटी असेल. मतदारसंघाच्या क्षेत्रातील जे मतदार कामाकरिता त्या त्या मतदारसंघाच्या बाहेर असणाऱ्या मतदारांना देखील लागू राहणार आहे. केंद्र शासनाच्या शासकीय कार्यालये, निमशासकीय कार्यालये, सार्वजनिक उपक्रम, बँका आदींना सार्वजनिक सुटी लागू राहील. त्यामुळे येत्या २ डिसेंबर रोजी पात्र मतदारांनी मतदान करावे, असे आवाहन डुडी यांनी केले आहे.

एक डिसेंबरपर्यंत प्रचार करता येणार

राज्य निवडणूक आयोगाच्या निर्देशाप्रमाणे नगरपरिषद व नगरपचांयतीच्या सार्वत्रिक निवडणुकीसाठी २ डिसेंबर रोजी मतदान सुरू होणार असून प्रचार १ डिसेंबर रोजी रात्री १० वाजता बंद करण्यात यावे; प्रचार बंद झाल्याच्या वेळेपासून सभा, मोर्चे, ध्वनिक्षेपकाचा वापर करता येणार नाही तसेच निवडणूक प्रचाराशी संबंधित जाहिरात प्रसिद्धी, प्रसारण देखील बंद करावे. जिल्ह्यातील उमेदवारांनी आयोगाच्या निर्देशाचे पालन करावे, असे आवाहन डुडी यांनी केले आहे.