Parabhani: सज्ज व्हा, उद्यापासून मिळणार महापौर, उपमहापौरपदासाठी नामनिर्देशन पत्र

विभागीय आयुक्त जितेंद्र पापळकर यांच्या आदेशानुसार मनपाच्या महापौर आणि उपमहापौर पदासाठी निवडणुकीची विशेष सभा पिठासीन अधिकारी जिल्हाधिकारी संजयसिंह चव्हाण यांच्या अध्यक्षतेखाली होणार आहे.

परभणी : महापौर आणि उपमहापौरपदासाठीच्या इच्छूकांना ३० जानेवारी ते ३ फेब्रुवारीपर्यंत नामनिर्देशन पत्र वितरित केले जाणार आहेत. तर हे नामनिर्देशन पत्र ३ फेब्रुवारीला सकाळी दहा ते सायंकाळी ५.४५ पर्यंत मनपाच्या प्रभारी नगरसचिव यांच्या कार्यालयात स्विकारले जाणर आहेत. याच ठिकाणी हे अर्ज मिळणार आहेत. त्यामुळे आजपासून या निवडीची रणधूमाळी सुरु होणार आहे.

विभागीय आयुक्त जितेंद्र पापळकर यांच्या आदेशानुसार मनपाच्या महापौर आणि उपमहापौर पदासाठी निवडणुकीची विशेष सभा पिठासीन अधिकारी जिल्हाधिकारी संजयसिंह चव्हाण यांच्या अध्यक्षतेखाली होणार आहे. त्यानुसार निवडणुकीचा पुढील कार्यक्रम जिल्हाधिकाऱ्यांनी गुरुवारी घोषित केला. ज्यामध्ये ३० जानेवारी ते दोन फेब्रुवारी दरम्यान सकाळी १० ते सायंकाळी ५.४५ पर्यंत तर ३ फेब्रुवारीला सुद्धा सकाळी दहा ते दुपारी तीन पर्यंत हे नामनिर्देशन पत्र वितरित होणार आहेत. नामनिर्देशन पत्र स्वीकारण्यासाठी ३ फेब्रुवारीला सकाळी दहा ते सायंकाळी ५.४५ पर्यंत कालावधी निश्चित केला आहे. महापालिकेच्या इमारतीतील प्रभारी नगरसचिव यांच्याकडे सदरील नामनिर्देशन पत्र मिळणार असून याच ठिकाणी ते ३ फेब्रुवारी अंतिम तारखेपर्यंत स्वीकारले जाणार आहेत.

विशेष सभा सुरू झाल्यावर छाननी...
९ फेब्रुवारीला सकाळी ११ वाजता बी.रघुनाथ सभागृहात विशेष सभा आयोजित केली आहे. पिठासीन अधिकाऱ्यांच्या अध्यक्षतेखाली या सभेमध्ये नामनिर्देशन पत्राची छाननी होणार आहे. छाननीअंती वैध उमेदवारांची नावे पिठासीन अधिकारी हे घोषित करतील. यानंतर पंधरा मिनिटाच्या कालावधीत लेखी नोटीस देऊन उमेदवारी मागे घेता येणार आहे व त्यानंतर निवडणूक लढविणाऱ्या उमेदवारांची नावे घोषित करून हातवर करून मतांची नोंद घेण्यात येणार आहे.

स्वत:ला दाखल करावे लागणार नामनिर्देशन
नामनिर्देशन पत्र, ओळखपत्राची सत्यप्रत निवडणूक लढविणाऱ्या निर्वाचित पालिका सदस्य यांना स्वतः दाखल करावी लागणार आहे. महापौर आणि उपमहापौर पदासाठी प्रत्येक उमेदवारास चारपेक्षा अधिक नामनिर्देशन पत्र दाखल करता येणार नाहीत. या पदासाठी कोणत्याही पालिका सदस्यास एकापेक्षा अधिक उमेदवाराची नामनिर्देशन पत्रे सूचित करता येणार नाहीत किंवा त्यास अनुमोदनही देता येणार नाही.