आरे जंगल परिसरात आग; धुराचे मोठे लोट, नागरिकांमध्ये चिंता

आगीचे नेमके कारण अद्याप स्पष्ट झालेले नाही.

मनोहर कुंभेजकर, मुंबई-आरे परिसरात आज गुरुवारी सायंकाळी  आग लागल्याची घटना घडली. न्यू दिंडोशी,गोरेगाव (पूर्व )येथील इन्फिनिटीआयआयटी पार्क परिसरातील जंगल भागात ही आग लागली होती.सायंकाळी ७:३२ वाजता मुंबई अग्निशमन दलाला घटनेची माहिती मिळाली. 

माहिती मिळताच अग्निशमन दल, पोलीस, वन विभाग तसेच वॉर्ड कर्मचारी तातडीने घटनास्थळी दाखल झाले. प्राथमिक माहितीनुसार, ही आग एफ. ई. दिनशॉ ट्रस्ट लँड अर्थात रहेजा परिसरात लागली होती , यावेळी संजय गांधी राष्ट्रीय उद्यानाचे अधिकारी व कर्मचारीही घटनास्थळी उपस्थित होते. 

आगीमुळे परिसरात धुराचे  लोट पसरल्याने नागरिकांमध्ये चिंतेचे वातावरण निर्माण झाले होते . सुदैवाने अद्याप कोणतीही जीवितहानी झाल्याची माहिती समोर आलेली नाही. दरम्यान, आगीवर मुंबई अग्निशमन दलाने नियंत्रण मिळवले असून आगीचे नेमके कारण अद्याप स्पष्ट झालेले नाही.