Kolhapur Municipal Corporation Election: प्रभागात जोडीला असणार कोण?, उमेदवारांचे आतापासूनच सेटिंग..!

अडीच हजारांवर मते घेण्याची क्षमता असलेल्या उमेदवारांवर लक्ष

भारत चव्हाण 

कोल्हापूर : महानगरपालिका निवडणुकीचा मार्ग मोकळा झाल्याने इच्छुक उमेदवार चांगलेच कामाला लागले आहेत. ज्या पद्धतीने पक्षीय पातळीवर उमेदवार शोध मोहीम राबविण्यात आली, तशी ती प्रभागनिहाय आपल्यासोबत उमेदवार कोण असावा, यासाठी जोडण्या लावण्यास सुरुवात झाली आहे. निवडून येण्याची शक्यता आहे, अशा उमेदवारांनी आपापसात चर्चेच्या माध्यमातून आराखडे मांडण्यास सुरुवात केली आहे.

कोल्हापूर महानगरपालिका निवडणूक यावेळी भाजप, काँग्रेस, राष्ट्रवादी अजित पवार गट, शिंदेसेना, उद्धवसेना, राष्ट्रवादी शरद पवार गट, आम आदमी पक्ष या प्रमुख पक्षांसह अन्य छोट्या-छोट्या राजकीय पक्ष व आघाड्यांनी लढविण्याचा निर्धार केला आहे. त्यादृष्टीने सगळ्याच राजकीय पक्ष नेत्यांनी तयारी केली आहे. प्रमुख पक्षाच्या नेत्यांनी, कारभाऱ्यांनी पक्षाच्या संभाव्य उमेदवारांची प्रभागनिहाय याद्याही तयार केल्या आहेत. पक्षीय पातळीवर इच्छुकांच्या बैठकाही होताना दिसत आहेत.

• ज्या पद्धतीने राजकीय पक्ष कामाला लागले आहेत, त्याच पद्धतीने प्रत्येक प्रभागात आपल्या सोबत अन्य तीन उमेदवार कोण असावेत, यादृष्टीनेही चाचपणी केली जात आहे. प्रभागाची व्याप्ती, मतदारांची संख्या विचारात घेता पूर्वीसारखे हजार दीड हजार मतांच्या गठ्ठ्यावर निवडून येण्याची शक्यता फारच कमी आहे.
• सरासरी चोवीस हजार मतदारांचा समावेश असलेल्या प्रभागातून निवडून येण्यासाठी किमान १० ते ११ हजार मते मिळविणे आवश्यक आहे. पण, तेवढी मते मिळविण्याची एकाही उमेदवाराची व्यक्तिगत क्षमता नाही. त्यामुळे प्रभागातच उमेदवारांमधील लॉबिंगला महत्त्व आले आहे.
• म्हणूनच, प्रभागात ज्याचे नाव आहे, काम आहे आणि ज्याची अडीच हजारांवर मते मिळविण्याची ताकद आहे अशा उमेदवारांची मोट बांधण्याचा काही प्रभागात प्रयत्न सुरू झाला आहे.
• एका प्रभागातून चार उमेदवार निवडून येणार आहेत. त्यामुळे अडीच ते तीन हजार मते घेणारे उमेदवारच निवडणुकीत जिंकण्याची शक्यता आहे. म्हणूनच, पक्षाबरोबरच स्थानिक उमेदवारांनीही अशा उमेदवारांचा शोध घेऊन लढण्याची तयारी सुरू केली आहे. तुम्ही अमुक पक्षाकडून, आम्ही तमुक पक्षाकडून उभे राहूया, असे वचन दिली जात आहेत.
• प्रभागात अशा जोडण्या केल्या जाऊ लागल्याने काही इच्छुकांचे कोणत्या राजकीय पक्षाची उमेदवारी घ्यायची अद्याप ठरलेले नाही. काही उमेदवारांनी स्वत: उभे राहायचे की पत्नीला उभे करायचे याचाही निर्णय घेतलेला नाही. परिस्थिती पाहून निर्णय घेऊ अशी त्यांची मानसिकता झाली आहे. राजकीय पक्षाच्या नेतेही अशा गठ्ठा मतदान घेणाऱ्या उमेेदवारांच्या हालचालीवर लक्ष ठेऊन आहेत.

अशीही संदिग्धता..

एकाच प्रभागात एखादी जागा सर्वसाधारण आहे. मग राजकीय पक्ष तिथे कुणाला उभे करणार आणि इतर आरक्षित जागेवर कुणाला, कोणत्या पक्षाला संधी देणार हे अजून निश्चित झालेले नाही. त्यामुळे आई लढणार की मुलगा, पती लढणार की पत्नी हे देखील निश्चित झालेले नाही. आमच्या घरातील कोणतरी उमेदवार असणार असे गृहित मांडून इच्छुकांनी प्रचार सुरू केला आहे.