फरहान अख्तर निर्मित 'बूंग' ठरला बाफ्टा पुरस्कार मिळवणारा पहिला भारतीय चित्रपट; पंतप्रधान मोदींनी केलं कौतुक

एक्सेल एंटरटेनमेंट आणि सूटेबल पिक्चर्स यांच्या ‘बूंग’ या चित्रपटाने भारताला जागतिक पातळीवर अभिमानास्पद स्थान मिळवून दिले आहे. प्रतिष्ठित British Academy Film Awards (BAFTA) पुरस्कार जिंकणारा हा पहिलाच भारतीय चित्रपट ठरला आहे.

 या मोठ्या यशाबद्दल सर्वत्र कौतुक आणि अभिनंदनाचा वर्षाव होत असताना आता पंतप्रधान नरेंद्र मोदी यांनीही चित्रपटाच्या टीमचे अभिनंदन केले आहे.आपली प्रतिक्रिया देताना पंतप्रधानांनी चित्रपटाशी संबंधित सर्व कलाकार आणि निर्मात्यांचे कौतुक केले. ते म्हणाले, “या चित्रपटाशी संबंधित सर्वांना हार्दिक अभिनंदन. हा खरोखरच अभिमानाचा आणि आनंदाचा क्षण आहे, विशेषतः मणिपूरसाठी. आपल्या देशातील अफाट सर्जनशील प्रतिभेचे हे उत्तम उदाहरण आहे.''

मणिपूरच्या पार्श्वभूमीवर आधारित हा चित्रपट एका कुटुंबाची भावस्पर्शी कथा मांडतो. ही गोष्ट ‘बूंग’ नावाच्या एका छोट्या मुलाभोवती फिरते (ही भूमिका Gugun Kipgen यांनी साकारली आहे), जो आपल्या कुटुंबाला पुन्हा एकत्र आणण्याचे स्वप्न पाहतो. त्याची सिंगल मदर मंदाकिनी (Bala Hijam Ningthoujam) हिच्यासोबत वाढलेला बूंग आपल्या जिवलग मित्रासह हरवलेल्या वडिलांच्या शोधात निघतो. या प्रवासात निरागसता, भावना आणि आई-मुलाच्या नात्याची सुंदर मांडणी करण्यात आली आहे.‘बूंग’च्या या यशामुळे संपूर्ण देशात आनंदाचे वातावरण आहे, विशेषतः मणिपूरमध्ये अभिमानाची भावना दाटून आली आहे. BAFTA मधील हा सन्मान केवळ चित्रपटाच्या कलात्मक गुणवत्तेची दखल घेत नाही, तर भारताच्या ईशान्येकडील राज्यांतील समृद्ध संस्कृती, इतिहास आणि कथेच्या समृद्ध परंपरेला जागतिक स्तरावर अधोरेखित करतो.