धाराशिव पालिकेच्या तीन प्रभागातील निवडणुका स्थगित; निवडणूक आयोगाने का केली कार्यवाही?

धाराशिव नगरपरिषदेच्या अध्यक्षपदासाठी व ४१ नगरसेवक पदांसाठी निवडणुकीची प्रक्रिया सुरू आहे.

धाराशिव : धाराशिव नगरपरिषदेच्या सार्वत्रिक निवडणुकीत गुरुवारी छाननीच्या वेळी अर्ज वैध-अवैध ठरविल्याच्या कारणावरून तीन प्रभागातील उमेदवार न्यायालयात गेले होते. त्यांच्या प्रकरणाची सुनावणी विहित वेळेत पूर्ण होऊ न शकल्याने राज्य निवडणूक आयोगाच्या निर्देशानुसार जिल्हाधिकाऱ्यांनी गुरुवारी या तिन्ही प्रभागातील निवडणुका स्थगित करण्याच्या सूचना पालिकेच्या निवडणूक निर्णय अधिकाऱ्यांना दिल्या आहेत.

धाराशिव नगरपरिषदेच्या अध्यक्षपदासाठी व ४१ नगरसेवक पदांसाठी निवडणुकीची प्रक्रिया सुरू आहे. छाननीदरम्यान, शहरातील प्रभाग क्रमांक २ अ, ७ ब व १४ ब या प्रभागातील अर्जाच्या वैध-अवैधतेवरून वादंग झाले. यामुळे संबंधित आक्षेपकर्त्यांनी व उमेदवारांनी जिल्हा न्यायालयात धाव घेतली होती. त्यांच्या प्रकरणावर चिन्ह वाटपापूर्वी निर्णय अपेक्षित होते. मात्र, विहित वेळेत न्यायालयीन आदेश प्राप्त न झाल्याने निवडणूक निर्णय अधिकारी ओंकार देशमुख यांनी २६ नोव्हेंबर रोजी राज्य निवडणूक आयोगाकडे तसेच जिल्हाधिकाऱ्यांकडेही मार्गदर्शन मागवले. त्यास आयोगाने संबंधित प्रभागातील निवडणुका पुढील आदेशापर्यंत स्थगित करण्याच्या सूचना केल्याने जिल्हाधिकाऱ्यांनी गुरुवारी पत्राद्वारे निवडणूक निर्णय अधिकाऱ्यांना या निवडणुका स्थगित करण्याचे निर्देश दिले आहेत.

नेमके कशामुळे प्रकरण न्यायालयात...
प्रभाग २ अ मधील उमेदवार सोनाली माने यांच्या शपथपत्रावर स्वाक्षरी नसल्याने अर्ज अवैध ठरविण्यात आला होता. न्यायालयाने हा अर्ज स्वीकार करण्याचे आदेश बुधवारी रात्री दिले. प्रभाग १४ ब मधील उमेदवार संजयकुमार वाघमारे यांनी आवश्यक कागदपत्रे अर्जासोबत जोडली नसल्याने अर्ज अवैध ठरला. न्यायालयाने हा निर्णय कायम ठेवला.

भाजपच्या शहराध्यक्षांना फटका...
भाजपचे शहराध्यक्ष अमित शिंदे हे प्रभाग ७ ब मधून उमेदवार होते. ते पालिकेच्या गाळ्याचे लाभधारक असल्याचा दावा करीत प्रतिस्पर्धी कृष्णा मुंडे यांनी आक्षेप घेतला होता. तो फेटाळून लावल्यानंतर मुंडे न्यायालयात गेले. न्यायालयानेही मुंडे यांचा दावा फेटाळून लावला. असे असले तरी तूर्त त्यांच्या प्रभागातील निवडणूक स्थगित झाल्याने शिंदे यांना फटका बसला आहे.