पाकिस्तान क्रिकेट बोर्डानं ( पीसीबी) नुकताच त्यांच्या 21 खेळाडूंचा सेंट्रल करार जाहीर केला. बाबर आझम, अझर अली आणि शाहीन शाह आफ्रिदी यांना सर्वाधिक पगाराच्या पंक्तित बसवण्यात आले आहे.
पीसीबीनं जाहीर केलेल्या नव्या करारात काहींना बढती मिळाली, तर काहींना आपलं स्थान गमवावं लागलं. अनेक नवीन चेहरेही या 21 खेळाडूंच्या यादीत दिसले.
पण, पाकिस्तानच्या या 21 खेळाडूंना PCB कडून मिळणारा एकत्रित पगार हा टीम इंडियाचा कर्णधार विराट कोहलीच्या वर्षभराच्या पगारा इतका आहे.
यावरूनच बीसीसीआय ही किती श्रीमंत क्रिकेट संघटना आहे हे स्पष्ट होते आणि म्हणूनच टीम इंडियाविरुद्ध खेळण्यासाठी पाकिस्तान उतावळे आहेत.
पीसीबीनंही A, B आणि C अशा तीन विभागांत खेळाडूंची विभागणी केली आहे. त्यानुसार खेळाडूंना पगार दिला जाणार आहे.
A विभागातील खेळाडूंना महिन्याला 5 लाख 16,489 आणि वर्षाला 61 लाख 97,879 इतका पगार दिला जातो. B विभागातील खेळाडूंना महिन्याला 3 लाख 52,152 आणि वर्षाला 42 लाख 26,358 इतका पगार मिळतो. c गटातील खेळाडूंना वर्षाला 2 लाख 58,320 आणि वर्षाला 30 लाख 99,319 इतका पगार दिला जातो.
बीसीसीआयनं A+, A, B आणि C अशा चार विभागांत विभागणी केली आहे. त्यानुसार A+ गटातील खेळाडूला वर्षाला 7 कोटी पगार दिला जातो. A, B आणि C विभागातील खेळाडूंना अनुक्रमे 5, 3 आणि 1 कोटी पगार दिला जातो.
पीसीबीच्या A विभागात बाबर आझम, अझर अली आणि शाहिन शाह आफ्रिदी यांचा समावेश आहे. अन्य विभागातील सर्व खेळाडूंना दिल्या जाणाऱ्या पगाराची बेरीज केल्यास ती जवळपास 7 कोटी 52 लाख 16,982 इतकी होते.
विराट कोहली, रोहित शर्मा आणि जसप्रीत बुमराह यांचा बीसीसीआयनं A+ विभागात समावेश केला आहे आणि या प्रत्येकाला वर्षाला 7 कोटी पगार दिला जातो.