कोरोना संकटात आयपीएलनं स्वतःचं बायो बबल तयार करून खेळाडू, सपोर्ट स्टाफ व त्यांच्या कुटुंबीयांना सुरक्षित ठेवले होते. पण, सोमवारी आयपीएलच्या बायो बबलवर कोरोना स्ट्राईक झाला. KKRचे वरुण चक्रवर्थी व संदीप वॉरियर्स यांचा रिपोर्ट पॉझिटिव्ह आला अन् सोमवारी RCBविरुद्ध होणारा सामना स्थगित करावा लागला.
त्यापाठोपाठ चेन्नई सुपर किंग्सचे (CSK) CEO कासी विश्वनाथन, गोलंदाज प्रशिक्षक लक्ष्मीपती बालाजी व बस क्लिनर यांचा कोरोना रिपोर्ट पॉझिटिव्ह आला आहे.
दिल्ली जिल्हा क्रिकेट असोसिएशनच्या कोटला मैदानावर आयपीएलचे सामने होत आहेत आणि त्या स्टेडियमवर काम करणाऱ्या पाच ग्राऊंड्समनचा रिपोर्टही पॉझिटिव्ह आल्याचे वृत्त आहे.
चेन्नई सुपर किंग्सचे सर्व खेळाडू सुरक्षित आहेत, पण चक्रवर्थीच्या एका चूकीनं KKRसंघासह दिल्ली कॅपिटल्सच्या खेळाडूंना तव्यावर ठेवलं आहे.
स्पोर्ट्स तक ( Sports Tak) नं दिलेल्या वृत्तानुसार वरुण चक्रवर्थी हा त्याच्या खांद्याच्या स्कॅनसाठी स्थानिक हॉस्पिटलमध्ये गेला अन् तिथून आल्यानंतर तो क्वांरटाईनमध्ये गेला नाही आणि दुसऱ्या दिवशी दिल्ली कॅपिटल्सविरुद्धचा सामना खेळला.
KKRनं त्यांच्या सर्व खेळाडू व स्टाफ सदस्यांना ६ मे पर्यंत क्वारंटाईनमध्ये राहण्यास सांगितले आहे. रोज या सर्वांची कोरोना चाचणी केली जाणार आहे. जर सर्वांचा कोरोना रिपोर्ट निगेटिव्ह आला, तर ७ मे रोजी RCBविरुद्धचा सामना होईल, असेही स्पोर्ट्स तकनं सांगितले आहे.
काय असंत ग्रीन चॅनेल ( Green Channel) - आयपीएलच्या ग्रीन चॅनेल नियमानुसार खेळाडूला उपचार हवे असल्यास किंवा त्याच्या दुखापतीचं स्कॅन करायचं असल्यास त्याला एका गाडीतून ( बायो बबल मध्ये असलेल्या चालकासह), PPE किट घालून हॉस्पिटलमध्ये नेले जाते. त्यानंतर वैद्यकिय अधिकारीही PPEकिट घालूनच उपचार करतात आणि खेळाडू पुन्हा त्याच गाडीतून बायो बबलमध्ये येतो.
दरम्यान पॅट कमिन्सची प्रकृती ठणठणीत असल्याची माहिती, त्याच्या मॅनेजरनं दिली आहे.