IPL Records: आयपीएलच्या इतिहासातील सुपरफास्ट शतक, 'या' दोन भारतीयांनी रचलाय इतिहास!

Top 5 Fastest Centuries in IPL History: आयपीएलच्या नव्या हंगामाचे बिगुल वाजले असून चाहत्यांमध्ये उत्साहाचे वातावरण आहे. क्रिकेटच्या या महाकुंभात आजवर अनेक ऐतिहासिक खेळी पाहायला मिळाल्या आहेत. परंतु, अशा काही खेळी आहेत, ज्या आजही प्रेक्षक विसरू शकलेले नाहीत. दरम्यान,आयपीएलच्या इतिहासात सर्वात कमी चेंडूंमध्ये शतक ठोकणाऱ्या टॉप-५ फलंदाजांवर एक नजर टाकूया.

ख्रिस गेल: आयपीएलमधील सर्वात वेगवान शतकाचा 'युनिव्हर्स बॉस' ख्रिस गेल हाच आहे. २०१३ मध्ये पुणे वॉरियर्स इंडियाविरुद्ध गेलने केवळ ३० चेंडूंमध्ये शतक झळकावून क्रिकेट विश्वात खळबळ उडवून दिली होती. त्याने ६६ चेंडूंत नाबाद १७५ धावांची खेळी केली, ज्यात १७ षटकार आणि १३ चौकारांचा समावेश होता. या सामन्यात आरसीबीने २६३ धावांचा डोंगर उभा केला होता.

वैभव सूर्यवंशी: भारताचा युवा स्टार फलंदाज वैभव सूर्यवंशी याने आपल्या पहिल्याच हंगामात इतिहास रचला. गुजरात टायटन्सविरुद्ध खेळताना या डावखुऱ्या फलंदाजाने अवघ्या ३५ चेंडूंमध्ये शतक ठोकले. २०९ धावांच्या आव्हानाचा पाठलाग करताना वैभवने ३८ चेंडूंत १०१ धावा कुटल्या आणि राजस्थान रॉयल्सला १६ षटकांतच विजय मिळवून दिला.

हेनरिक क्लासेन: सनरायझर्स हैदराबादच्या हेनरिक क्लासेनने कोलकाता नाईट रायडर्सविरुद्ध तुफानी फलंदाजी करत ३७ चेंडूंमध्ये शतक पूर्ण केले. त्याने ३९ चेंडूंत नाबाद १०५ धावांची खेळी साकारली. या सामन्यात हैदराबादने २७८ धावांची ऐतिहासिक धावसंख्या उभारली होती आणि शेवटी ११० धावांनी दणदणीत विजय मिळवला.

युसूफ पठाण: भारतीय अष्टपैलू खेळाडू युसूफ पठाणने २०१० मध्ये मुंबई इंडियन्सविरुद्ध आपली ताकद दाखवून दिली. त्याने केवळ ३७ चेंडूंमध्ये शतक झळकावले. २१३ धावांच्या मोठ्या लक्ष्याचा पाठलाग करताना पठाणने राजस्थानला विजयाच्या उंबरठ्यावर नेले. मात्र, दुर्दैवाने राजस्थानचा संघ ४ धावांनी मागे पडला. आजही हे आयपीएलमधील सर्वोत्तम शतकांपैकी एक मानले जाते.

डेव्हिड मिलर: किलर मिलर म्हणून ओळखल्या जाणाऱ्या डेव्हिड मिलरने २०१३ मध्ये आरसीबीविरुद्ध अशक्य वाटणारा विजय खेचून आणला होता. १९१ धावांचा पाठलाग करताना त्याने अवघ्या ३८ चेंडूंमध्ये शतक झळकावून पंजाबला ६ विकेट्स राखून विजय मिळवून दिला. मिलरच्या या स्फोटक खेळीमुळे आजही त्याचे नाव या यादीत अबाधित आहे.