जेम्स अँडरसन आणि स्टुअर्ट ब्रॉड या इंग्लंडच्या दिग्गज जलदगती गोलंदाजांनी शनिवारी कसोटी क्रिकेटमध्ये ऐतिहासिक कामगिरीची नोंद केली. कसोटी क्रिकेटमध्ये मिळून सर्वाधिक १००२* विकेट्स घेण्याचा पराक्रम या दोघांनी केला.
इंग्लंडने पहिला डाव ९ बाद ३२५ धावांवर घोषित केल्यानंतर न्यूझीलंडचा पहिला डाव ३०६ धावांत गडगडला. इंग्लंडने दुसऱ्या डावात ३७४ धावा करून किवींसमोर विजयासाठी ३९४ धावांचे लक्ष्य ठेवले आहे आणि दुसऱ्या डावात त्यांची अवस्था ३ बाद २७ अशी झाली आहे.
दरम्यान, १५ वर्ष सोबत खेळणाऱ्या स्टुअर्ट ब्रॉड व जेम्स अँडरसन या जोडीने ९३०८.१ षटकं टाकताना मोठ्या विक्रमाला गवसणी घातली. १३३ कसोटींत या जोडीने सर्वाधिक १००२* विकेट्स घेण्याचा मोठा पराक्रम केला.
जेम्स अँडरसन व स्टुअर्स ब्रॉड यांनी १३३ कसोटींत हा पराक्रम करताना ऑस्ट्रेलियन दिग्गज ग्लेन मॅक्ग्राथ व शेन वॉर्न यांचा १००१ विकेट्सचा ( १०४ कसोटी) विक्रम मोडला.
या विक्रमात श्रीलंकन जोडी चामिंडा वास व मुथय्या मुरलीधरन ८९५ विकेट्ससह ( ९५ कसोटी) तिसऱ्या, तर वेस्ट इंडिजचे दिग्गज कर्टनी वॉल्श व कर्ट्ली एम्ब्रोज ७६२ विकेट्ससह ( ९५ कसोटी) चौथ्या क्रमांकावर आहे.