नागपुरात क्रिकेट अकादमीच्या उद्घाटनावेळी गोंधळ झाल्याने भारतीय क्रिकेट संघाचा माजी कर्णधार महेंद्रसिंह धोनी कार्यक्रम अर्ध्यावर सोडून परत गेला.
एसजीआय या संस्थेमार्फत नागपूरच्या गायकवाड पाटील आंतरराष्ट्रीय शाळेच्या आवारात धोनी रेसिडेंशियल क्रिकेट अकादमी सुरु करण्यासाठी आला होता.
या अकादमीचं उद्घाटन महेंद्रसिंह धोनीच्या हस्ते झालं. मात्र, ढिसाळ नियोजन आणि उद्घाटन कार्यक्रमातील गोंधळामुळे नाराज झालेल्या धोनीने कार्यक्रम अर्ध्यावर सोडला आणि हॉटेलवर परतला.
अकादमीचं उद्घाटन झाल्यानंतर स्टेजजवळ मीडियाचे कॅमेरे आणि हौशी प्रेक्षक मोबाईलमध्ये धोनीची झलक कैद करणारे जमा झाले. परिणामी इथे तुफान गर्दी झाली.
धोनीच्या सुरक्षेसाठी असलेल्या खाजगी सुरक्षा एजन्सीच्या बाऊन्सर्सनी लोकांसोबत धक्काबुक्की केली. त्यामुळे धोनी काहीसा नाराज झाला होता.
सुरुवातीला प्रचंड गर्दी झाल्याने धोनीचे स्टेजपर्यंत आगमन मुख्य मार्गावरुन शक्य झाले नाही. त्यामुळे धोनीला मागच्या बाजूने गवताच्या आणि काटेरी झुडूपांमधून उद्घाटनस्थळी आणावं लागलं.
स्टेजवरील कार्यक्रम संपल्यानंतर धोनी रेसिडेंशियल अकादमीच्या खेळाडूंसोबत मैदानावर जाणार होता. मात्र नाराज धोनीने तिकडे न जाताच आणि थेट हॉटेल गाठलं.
आयोजनकांनी उपस्थित लोकांना धोनी निघून गेल्याचे सांगितलंच नाही. साडेबारा वाजेपर्यंत लोक मैदानाजवळ धोनी येईल म्हणून वाट पाहत बसले होते. अखेर पोलिसांनी पाऊणच्या सुमारास धोनीने शाळेचा परिसर सोडल्याचं उपस्थितांना सांगितलं. ( सर्व छायाचित्रेः राजेश टिकले)