ऋतुराज गायकवाडने कुटल्या ३६ चेंडूंत १०२ धावा; ऑस्ट्रेलियाविरुद्ध पाडला विक्रमांचा पाऊस

India vs Australia 3rd T20I Live : ऋतुराज गायकवाडने ( Ruturaj Gaikwad Century) आज ऑस्ट्रेलियाच्या गोलंदाजांचा पालापाचोळा केला.

२४ धावांवर २ फलंदाज बाद झाल्यानंतर कर्णधार सूर्यकुमार यादवसह ऋतुराजने डाव सावरला. त्यानंतर तिलक वर्मासोबत १४१ धावांची भागीदारी करून टीम इंडियाला २ बाद २२२ धावांपर्यंत पोहोचवले.

सूर्यकुमार यादव २९ चेंडूंत ५ चौकार व २ षटकारासह ३९ धावांवर झेलबाद झाला आणि ऋतुराजसह त्याची ५७ ( ४७ चेंडू) धावांची भागीदारी तुटली. त्यानंतर ऋतुराजने जबरदस्त फटकेबाजी केली. ऋतुराजने षटकाराने आंतरराष्ट्रीय ट्वेंटी-२०तील पहिले शतक पूर्ण केले. ऋतुराज ५७ चेंडूंत १३ चौकार व ७ षटकारांसह १२३ धावांवर नाबाद राहिला. तिलकने नाबाद ३१ धावा करताना ऋतुराजसह ५९ चेंडूंत १४१ धावांची भागीदारी केली.

आंतरराष्ट्रीय ट्वेंटी-२०त शतक झळकावणारा तो नववा फलंदाज ठरला. रोहित शर्मा ( ४), सूर्यकुमार यादव ( ३) व लोकेश राहुल ( २) यांनी एकापेक्षा अधिक शतक झळकावली आहेत. सुरेश रैना, विराट कोहली, दीपक हुडा, शुबमन गिल, यशस्वी जैस्वाल व ऋतुराज यांच्या नावावर एक शतक आहे. ऑस्ट्रेलियाविरुद्ध ट्वेंटी-२०त शतक झळकावणारा तो पहिला भारतीय ठरला.

ऋतुराजने नाबाद १२३ धावा केल्या आणि आंतरराष्ट्रीय ट्वेंटी-२०तील ही भारताकडून दुसरी सर्वोत्तम वैयक्तिक धावसंख्या ठरली. शुबमन गिलने २०२३ मध्ये न्यूझीलंडविरुद्ध नाबाद १२६ धावा केल्या होत्या. विराट कोहलीने २०२१ मध्ये अफगाणिस्तानविरुद्ध १२२ धावा केल्या होत्या.

गायकवाडने आज पहिल्या २१ चेंडूंत २१ धावा केल्या होत्या, त्यानंतर पुढील ३४ चेंडूंत त्याने १०१ धावांची खेळी केली. शेवटच्या ३ षटकांत ऋतुराजने ५२ धावा कुटल्या. युवराजने २००७मध्ये शेवटच्या १४ चेंडूंत ५४ धावा कुटल्या होत्या. ऋतुराजने आज विराटचा ( ४५ धावा वि. अफगाणिस्तान) विक्रम मोडला.