३ 'आउट' अन् २ 'इन'! मागील ४ वर्षांत इंग्लंडमध्ये सर्वाधिक धावा करणारे ५ भारतीय फलंदाज

इंग्लंड दौऱ्यात मागील चार वर्षांत सर्वाधिक धावा करणारे भारतीय फलंदाज, यावेळी त्यातील फक्त दोघेच आहेत गिलच्या नेतृत्वाखालील टीम इंडियााच भाग

शुबमन गिलच्या नेतृत्वाखालील भारतीय संघ इंग्लंडच्या मैदानातील १८ वर्षांचा दुष्काळ संपवण्यासाठी मैदानात उतरणार आहे.

यावेळी इंग्लंड दौऱ्यावरील टीम इंडियात २०२१ पासून इंग्लंडमध्ये सर्वाधिक धावा करणाऱ्या आघाडीच्या पाच भारतीय खेळाडूंमधील फक्त दोघांचाच समावेश आहे.

रोहित शर्मा आणि विराट कोहली यांनी कसोटीतून निवृत्ती घेतली आहे. दुसरीकडे या यादीत असणारा पुजाराही संघाबाहेर आहे. इथं एक नजर टाकुयात २०२१ पासून इंग्लंडच्या मैदानात सर्वाधिक धावा करणाऱ्या आघाडीच्या ५ भारतीय फलंदाजांच्या रेकॉर्डवर

२०२१ पासून इंग्लंडमध्ये सर्वाधिक धावा करणाऱ्या फलंदाजांच्या यादीत रोहित शर्मा अव्वलस्थानी आहे. यंदाच्या इंग्लंड दौऱ्याआधीच त्याने कसोटी क्रिकेटमधून निवृत्ती घेतलीये. ६ सामन्यातील १२ डावात त्याने ४४.५४ च्या सरासरीने ४९० धावा केल्या आहेत. यात एका शतकासह दोन अर्धशतकांचा समावेश आहे.

रिषभ पंतने २०२१ पासून इंग्लंडमध्ये ६ कसोटी सामने खेळले असून ११ डावात त्याने ३५.८१ च्या सरासरीने १ शतक आणि दोन अर्धशतकाच्या मदतीने ३९४ धावा केल्या आहेत.

चेतेश्वर पुजाराने २०२१ पासून ७ कसोटी सामन्यातील १४ डावात २८.४६ च्या सरासरीसह ३७० धावा केल्याचा रेकॉर्ड आहे. यात त्याच्या भात्यातून ३ अर्धशतके आली होती.

विराट कोहलीनं २०२१ पासून ७ सामन्यातील १३ डावात २८.३८ च्या सरासरीने २ अर्धशतकासह ३६९ धावा केल्यात. त्यानेही कसोटीतून निवृत्ती घेतली आहे.

रवींद्र जडेजानं २०२१ पासून ७ सामन्यातील १३ डावात २८.१५ च्या सरासरीने ३६६ धावा केल्या आहेत. यात एक शतक आणि एका अर्धशतकाचा समावेश आहे.