२२३ धावांच्या लक्ष्याचा पाठलाग करताना ऑस्ट्रेलियाचा निम्मा संघ १३४ धावांत माघारी परतला होता. ३९ चेंडूंत विजयासाठी ८८ धावांची गरज असताना मॅक्सवेल उभा राहिला. त्याने ८ चौकार व ८ षटकारांची आतषबाजी करून शेवटच्या चेंडूवर ऑस्ट्रेलियाला विजय मिळवून दिला.
ऋतुराज गायकवाड ५७ चेंडूंत १३ चौकार व ७ षटकारांसह १२३ धावांवर नाबाद राहिला. २४ धावांवर २ फलंदाज बाद झाल्यानंतर कर्णधार सूर्यकुमार यादवसह ऋतुराजने डाव सावरला. सूर्यकुमार यादव २९ चेंडूंत ५ चौकार व २ षटकारासह ३९ धावांवर झेलबाद झाला आणि ऋतुराजसह त्याची ५७ ( ४७ चेंडू) धावांची भागीदारी तुटली. तिलकने नाबाद ३१ धावा करताना ऋतुराजसह ५९ चेंडूंत १४१ धावांची भागीदारी केली आणि टीम इंडियाला २ बाद २२२ धावांपर्यंत पोहोचवले.
ट्रॅव्हिस हेड ( ३५), आरोन हार्डी ( १६), जोश इंग्लिस ( १०), मार्कस स्टॉयनिस ( १७) व टीम डेव्हिड ( ०) माघारी परतल्याने ऑस्ट्रेलियाची हार पक्की मानली जात होती. पण, मॅक्सवेल व कर्णधार मॅथ्यू वेड जोडी उभी राहिली. या दोघांनी ४० चेंडूंत ९१ धावांची नाबाद भागीदारी केली. शेवटच्या ४ चेंडूंत १६ धावा हव्या असताना मॅक्सवेलने ६,४,४,४ धावा चोपून ऑस्ट्रेलियाचा ५ विकेट्सने विजय पक्का केला. मॅक्सवेल ४८ चेंडूंत ८ चौकार व ८ षटकारांसह नाबाद १०४ धावा चोपल्या. वेड १६ चेंडूंत २३ धावांवर नाबाद राहिला.
आंतरराष्ट्रीय ट्वेंटी-२०मध्ये भारताविरुद्ध सर्वाधिक ३७ षटकारांचा विक्रम आज ग्लेन मॅक्सवेलने नावावर केले. सर्बियाच्या लेस्ली ड्युनबरने बल्गेरियाविरुद्ध ४२ षटकार खेचले आहेत. त्यानंतर रोहित शर्माचा ( ३९ षटकार वि. वेस्ट इंडिज) क्रमांक येतो.
भारताविरुद्ध ट्वेंटी-२०त ५०० हून अधिक धावा करणारा ग्लेन मॅक्सवेल हा तिसरा फलंदाज बनला. निकोलस पूरनने सर्वाधिक ५९२ धावा केल्या आहेत, त्यापाठोपाठ मॅक्सवेल ( ५५४), आरोन फिंच ( ५००), जोस बटलर ( ४७५), दासून शनाका ( ४३०) व मॅथ्यू वेड ( ४२९) यांचा क्रमांक येतो.
आंतरराष्ट्रीय ट्वेंटी-२०तील भारताविरुद्ध धावांचा यशस्वी पाठलाग करण्याच्या विक्रमात आजच्या सामनाचा पहिला क्रमांक लागला. यापूर्वी दक्षिण आफ्रिकेने दिल्ली येथे भारताने विजयासाठी ठेवलेल्या २१२ धावांचा यशस्वी पाठलाग केला होता.
आंतरराष्ट्रीय ट्वेंटी-२०त सर्वाधिक ४ शतकांच्या रोहित शर्माच्या विक्रमाशी आज ग्लेन मॅक्सवेलने बरोबरी केली. सूर्यकुमार यादव, कॉलिन मुन्रो व बाबर आजम यांच्या नावावर प्रत्येकी ३ शतकं आहेत. पण, लक्ष्याचा पाठलाग करताना ट्वेंटी-२०त तीन शतकं झळकावणारा ग्लेन मॅक्सवेल हा जगातील एकमेव फलंदाज ठरला आहे.
मॅक्सवेलने ऑस्ट्रेलियाकडून सर्वात कमी ४७ चेंडूंत ट्वेंटी-२०त शतकाच्या विक्रमाशी बरोबरी केली. आरोन फिंचने ( वि. इंग्लंड, २०१३) आणि जोश इंग्लिस ( वि. भारत, २०२३) यांनी ४७ चेंडूंत शतक झळकावले होते.