भारत आणि वेस्ट इंडिज यांच्यातील क्रिकेट मालिकेत यजमानांनी धुमाकूळ घातला आहे. कसोटी व वन डे मालिकेपाठोपाठ संघाने ट्वेंटी-20 मालिकेतही विजयी आघाडी घेताना भारतीयांना दिवाळी भेट दिली. याच दिवाळीच्या सणात क्रिकेटपटूंच्या नावाने फटाके बाजारात आले, तर कोणत्या खेळाडूला कोणत्या फटाक्याची नाव मिळेल? चला आपण जाणून घेऊया...
रोहित शर्मा (5000 ची माळ) : जगातील सर्वात घातकी सलामीवीर म्हणून ओळखला जातो. एकदा त्याच्या बॅटीतून धावांचा ओघ सुरू झाला की तो प्रतिस्पर्धी गोलंदाजांना वाहूनच घेऊन जातो.
शिखर धवन (पाऊस) : मर्यादित षटकांच्या क्रिकेटमधील स्टायलिश फलंदाज म्हणून शिखर धवनची ओळख. पावसासारखा हळुहळू पेट घेत तो मोठा धमाका करण्याची त्यात क्षमता आहे.
महेंद्रसिंग धोनी ( रॉकेट) : महेंद्रसिंग धोनीचा षटकार हा पाहातच राहावा असा असतो. त्याने मारलेल्या फटक्यावर चेंडू एखाद्या रॉकेटप्रमाणे सीमारेषेपार जातो..
विराट कोहली ( आतषबाजी करणारा फटाका) :क्रिकेटचा कोणताही फॉरमॅट असो विराट कोहलीची बॅट तळपली की प्रतिस्पर्धी संघाकडे हतबल होऊन पाहत राहण्याकडे काहीच राहत नाही. विराटची फटकेबाजी म्हणजे चाहत्यांसाठी फटाक्यांची आतषबाजीच...
सचिन तेंडुलकर ( पेन्सील टॉर्च) : क्रिकेटचा देव आंतरराष्ट्रीय क्रिकेटमधून निवृत्त झाला असला तरी त्याचे आजही तितकेच फॅन्स आहेत. पेन्सील टॉर्चप्रामणे तो आजही चाहत्यांच्या गळ्यातील ताईत आहे.
राहुल द्रविड ( फुलबाजा) : ज्यांना क्रिकेटबद्दल जाण नाही त्यांनाही राहुल द्रविडने प्रेमात पाडले आहे. कोणत्याही वयोगटातील चाहत्यांना आवडावा अस द्रविड आहे.
युवराज सिंग ( पाऊस बॉम्ब ) : भारतीय संघातील यशस्वी अष्टपैलू खेळाडू म्हणून युवराज सिंग ओळखला जातो. त्याने 2007च्या विश्वचषक स्पर्धेतील त्याची एका षटकातील सहा षटकारांची आतषबाजी असो किंवा आणखी अन्य स्फोटक खेळी.. युवी पाऊस बॉम्बसारखा आहे.
हार्दिक पांड्या ( रंगीबेरंगी काडीपेट्या) : मैदानावरील कामगिरीबरोबर विविध स्टाईल्समुळे हार्दिक पांड्या चाहत्यांमध्ये प्रसिद्ध आहे.
जस्प्रीत बुमरा ( रशी) : भारतीय संघाचा प्रमुख गोलंदाज जस्प्रीत बुमराने एकदा विकेट घेण्याचा सपाटा लावला की तो प्रतिस्पर्धी संघाला बेजार करून सोडतो.
कुलदीप यादव ( चक्री) : आपल्या फिरकीच्या तालावर कुलदीप यादव प्रतिस्पर्धी फलंदाजांना चांगलाच नाचवतो.