भारत-ऑस्ट्रेलिया दुसऱ्या वन डे सामन्यात अॅरोन फिंच आणि डेव्हिड वॉर्नर भारतीय गोलंदाजांची पीसे काढत असताना दुसरीकडे न्यूझीलंडच्या फलंदाजांनी चौकार-षटकारांचा पाऊस पाडला. वेस्ट इंडिजविरुद्धच्या दुसऱ्या ट्वेंटी-20 सामन्यात ग्लेन फिलिप्सनं ( Glenn Phillips) न्यूझीलंडकडून सर्वात जलद शतकाची नोंद केली. त्यानं विंडीज गोलंदाजांचा चांगलाच समाचार घेताना संघाला ३ बाद २३८ धावांचा डोंगर उभा करून दिला. न्यूझीलंडची ही ट्वेंटी-20 क्रिकेटमधील तिसरी सर्वोत्तम कामगिरी आहे.
मार्टिन गुप्तील आणि टीम सेईफर्ट यांनी किवींना साजेशी सलामी दिली. ओशाने थॉमसनं त्यांची ४९ धावांची भागीदारी संपुष्टात आणली. सेईफर्ट ( १८) माघारी परतल्यानंतर गुप्तीलही ( ३४) पुढच्याच षटकात फॅबीअन अॅलनच्या गोलंदाजीवर माघारी परतला. त्यानंतर फिलिप्स व डेव्हॉन कॉनवे ( Devon Conway) यांनी तुफान फटकेबाजी केली. दोघांनी तिसऱ्या विकेटसाठी विक्रमी १८४ धावांची भागीदारी केली. ट्वेंटी-20 क्रिकेटमधील ही नॉन-ओपनिंग खेळाडूंनी केलेली सर्वोत्तम भागीदारी ठरली. यापूर्वी इंग्लंडच्या डेव्हिड मलान व इयॉन मॉर्गन यांनी २०१९मध्ये न्यूझीलंडविरुद्ध १८२ धावांची भागीदारी केली होती.
न्यूझीलंडनं २० षटकांत ३ बाद २३८ धावा चोपल्या. फिलिप्सनं ५१ चेंडूंत १० चौकार व ८ षटकारांसह १०८ धावा चोपल्या. कॉनवेनं ३७ चेंडूंत ( ४ चौकार व ४ षटकार) नाबाद ६५ धावा केल्या. फिलिप्सनं ४६ चेंडूंत शतक पूर्ण केले. यापूर्वी कॉलिन मुन्रोनं २०१८मध्ये विंडीजविरुद्ध ४७ चेंडूंत शतक झळकावलं होतं.
Web Title: NZ vs WI: Glenn Phillips records fastest T20I century from New Zealand; NZ to 238/3, their third-highest T20I total
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
