मुंबई : भारतीय संघाचा उपकर्णधार रोहित शर्माला अखेरीस मुलगी समायराला वेळ देण्याची संधी मिळाली. ऑस्ट्रेलिया आणि न्यूझीलंड दौऱ्यात भारतीय संघाने विक्रमी कामगिरी केली. न्यूझीलंडमध्ये भारतीय संघ रोहितच्या नेतृत्वाखाली वन डे मालिकेतील अखेरचे दोन सामने व ट्वेंटी-20 मालिका खेळला. ट्वेंटी-20 मालिकेत भारताला 1-2 अशी हार पत्करावी लागली असली तरी हा दौरा खेळाडूंची कामगिरी उंचावणारा ठरला. न्यूझीलंडवरून मायदेशात परतताच रोहितने आपल्या मुलीला वेळ देणे महत्त्वाचे समजले.
ऑस्ट्रेलियाविरुद्धच्या कसोटी मालिकेदरम्यान रोहितला कन्यारत्न प्राप्ती झाली. त्यानंतर तो मायदेशी परतला आणि त्यामुळे त्याला सिडनी कसोटीत खेळता आले नव्हते. त्यानंतर वन डे मालिकेसाठी तो आठवडाभरात पुन्हा ऑस्ट्रेलियात परतला. त्यानंतर जवळपास महिनाभर तो मुलीपासून दूर होता. त्यानंतर मायदेशात परतताच रोहितने मुलीसोबत वेळ घालवला. रोहितची पत्नी रितिकाने इंस्टाग्रामवर समायराचा व्हिडीओ शेअर केला.
मात्र, वर्ल्ड कप स्पर्धा डोळ्यासमोर ठेवून भारतीय क्रिकेट नियामक मंडळ ( बीसीसीआय) ऑस्ट्रेलियाविरुद्धच्या मालिकेत संघातील वरिष्ठ खेळाडूंना विश्रांती देण्याच्या विचारात आहे. विश्रांती देणाऱ्या खेळाडूंमध्ये रोहित शर्माचे नाव आघाडीवर आहे आणि लोकेश राहुल व अजिंक्य रहाणे संघात कमबॅक करण्याची शक्यता आहे. याआधी कर्णधार विराट कोहलीला न्यूझीलंडविरुद्धच्या अखेरच्या दोन वन डे व ट्वेंटी-20 मालिकेत विश्रांती देण्यात आली होती.