भारताच्या कसोटी संघाबाहेर बसलेला चेतेश्वर पुजारा ( Cheteshwar Pujara) पुनरागमनासाठी सातत्याने प्रयत्न करताना दिसतोय. मागील दोन वर्षांत कसोटीत सातत्यपूर्ण कामगिरी करू न शकलेल्या चेतेश्वर पुजाराला श्रीलंकेविरुद्धच्या कसोटी मालिकेत बाकावर बसवण्यात आले. त्यानंतर तो संघात पुनरागमन करण्यासाठी रणजी करंडक स्पर्धेत खेळला, परंतु एकदा ९०+ धावा केल्यानंतर त्याला फार काही करत आले नाही. आता चेतेश्वर पुजारा कौंटी चॅम्पियनशीपमध्ये खेळणार आहे. कौंटी चॅम्पियनशीपच्या ससेक्स ( Sussex) क्लबने त्याला करारद्ध केले आहे आणि तो तेथील वन डे कप स्पर्धेतही खेळताना दिसेल. ट्रॅव्हीस हेडने माघार घेतल्यामुळे चेतेश्वरला संधी मिळाली आहे.
हेड व त्याची पत्नी यांना पहिलं बाळ होणार असल्यामुळे खेळाडूने क्रिकेटमधून विश्रांती घेण्याचा निर्णय घेतला. चेतेश्वर पुजारा आता संपूर्ण चॅम्पियनशीपमध्ये खेळणार आहे. यापूर्वी त्याने डर्बीशायर, नॉटिंगहॅमशायर व यॉर्कशायर क्लबचे प्रतिनिधित्व केले आहे. चेतेश्वर पुजारा म्हणाला,''ससेक्स कौंटी क्रिकेट क्लबकडून खेळण्यासाठी मी उत्साहीत आहे. मी अनेक वर्ष लंडनमध्ये कौंटी क्रिकेट खेळतोय.''