IPL 2021, Royal Challengers Bangalore vs Delhi Capitals Live Updates : रॉयल चॅलेंजर्स बंगलोरनं ( RCB) शुक्रवारी अखेरच्या चेंडूवर दिल्ली कॅपिटल्सला ( DC) हार मानण्यास भाग पाडले. श्रीकर भरत व ग्लेन मॅक्सवेल यांनी RCBला हा थरारक विजय मिळवून दिला. १६५ धावांच्या लक्ष्याचा पाठलाग करताना भरतनं अखेरच्या चेंडूवर खणखणीत षटकार खेचून RCBचा विजय पक्का केला. या रोमहर्षक विजयानंतर कर्णधार विराट कोहलीनंही भारी जल्लोष केला. त्याच्या या जल्लोषाचा व्हिडोओ सध्या सोशल मीडियावर धुमाकूळ घालतोय..
अखेरच्या षटकातील थरार... आवेश खाननं टाकलेल्या २०व्या षटकाच्या पहिल्या दोन चेंडूवर मॅक्सवेलनं ६ धावा करताना वैयक्तिक अर्धशतकासह भरतसह शतकी भागीदारी पूर्ण केली. आवेशनं तिसरा चेंडू यॉर्कर फेकला अन् मॅक्सवेलसाठी LBWची अपील झाली. DCनं त्यासाठी DRS घेतला. मॅक्सवेलनं आयपीएलमध्ये २००० धावांचा पल्लाही पार केला. भरत स्ट्राईकवर असताना आवेशनं चौथा चेंडू निर्धाव फेकला आणि आता RCBला २ चेंडूंत ८ धावा करायच्या होत्या. पाचव्या चेंडूवर दोन धावा मिळाल्या, त्यात एक Wide चेंडू फेकला गेला. त्यामुळे १ चेंडू ५ धावा असा सामना आला. अखेरच्या फुलटॉसवर भरतनं षटकार खेचून RCBला ७ विकेट्सनं विजय मिळवून दिला.