क्रिकेट कसं खेळायचं हे शिकवतानाच आयुष्य कसं जगायचं हेही तुम्ही शिकवलंत असं म्हणत भारताचा अष्टपैलू खेळाडू केदार जाधवने भारताचा माजी कर्णधार महेंद्रसिंग धोनीला 39व्या वाढदिवशी भावनिक पत्र लिहिलं. केदार आणि धोनी यांची घट्ट मैत्री सर्वांनाच ज्ञात आहे. केदारने वेळोवेळी धोनीचे कौतुक केले आहे आणि त्याचे आभारही मानले आहेत. त्यामुळेच आज धोनीच्या वाढदिवसाचे निमित्त साधत केदारने त्याच्या भावना पत्राद्वारे व्यक्त केल्या आहेत. या पत्राद्वारे केदारने त्याच्या क्रिकेट प्रवासाला उजाळा दिला. धोनीसोबतचे नाते कसे तयार झाले, कसे दृढ होत गेले याबाबतही सांगितले आहे.
सध्या लॉकडाऊनच्या काळात भारतीय संघातील अनेक खेळाडूंनी लाईव्हद्वारे चाहत्यांशी संवाद साधला. धोनी मात्र याला अपवाद होता. असे असले तरी धोनीच्या वाढदिवसाची त्याच्या चाहत्यांनी आठवडाभर आधीपासूनच जय्यत तयारी सुरु केली होती. धोनीचा आज 39वा वाढदिवस आहे. भारताचा सर्वांत यशस्वी कर्णधार असलेल्या धोनीवर सर्वस्तरातून शुभेच्छांचा वर्षाव करण्यात येत आहे. त्यातच केदारचे हे पत्र म्हणजे 'चेरी ऑन दी केक' आहे.