विजय वडेट्टीवार, किशोर जोरगेवारांची माघार, धानोरकरांसह १३ संचालक अविरोध

जिल्हा बँक निवडणूक : आता २३ उमेदवारांमध्ये सात जागांसाठी निवडणूक, गोंडपिपरीत उमेदवारच नाही

लोकमत न्यूज नेटवर्क
चंद्रपूर : जिल्हा मध्यवर्ती सहकारी बँकेच्या २१ संचालकपदाच्या निवडणुकीत खासदार प्रतिभा धानोरकर यांच्यासह तब्बल १३ संचालक अविरोध निवडून आले. आमदार विजय वडेट्टीवार व आमदार किशोर जोरगेवार यांच्यासह ११३ उमेदवारांनी शुक्रवारी (दि. २७) निवडणुकीच्या मैदानातून माघार घेतली. आता केवळ सात संचालकांसाठी २३ उमेदवारांमध्ये निवडणूक होणार आहे. विशेष म्हणजे अ गटातून सहकारी क्षेत्रातील सर्वाधिक १० दिग्गज उमेदवारांनी आपली पकड कायम ठेवल्याचे स्पष्ट झाले आहे.

जिल्हा मध्यवर्ती सहकारी बँकेच्या संचालक पदांसाठी २१३ नामांकन दाखल झाले होते. छाननीनंतर १५५ नामांकन पात्र ठरले होते. पैकी सहा जण न्यायालयातून अपात्र ठरले. ११३ जणांनी माघार घेतल्याने निवडूणक रिंगणात २३ उमेदवार उरले आहे. बँकेच्या निवडणुकीत इतिहासात पहिल्यांदाच एक खासदार, दोन आमदार व एका माजी आमदाराने नामांकन दाखल केल्याने राजकीय क्षेत्रात चर्चेचा विषयाचा झाला. दरम्यान, सात उमेदवारांच्या नामांकनाविरोधात उच्च न्यायालयाच्या नागपूर खंडपिठात तसेच विभागीय उपनिबंधकांकडे धाव घेतली. त्यानंतर न्यायालयाने सात उमेदवारांचे नामांकन पात्र ठरविले. शुक्रवारी (दि. २७) नामांकन मागे घेण्याचा शेवटचा दिवस होता. यावेळी आमदार विजय वडेट्टीवार यांनी सिंदेवाही अ गटातून आणि आमदार किशोर जोरगेवार यांनी गट ब २ तसेच अनुसूचित जाती गटातून निवडणुकीच्या रिंगणातून माघार घेतली आहे. गोंडपिपरीत उल्हास करपे व अमर बोडलावार यांचे नामांकन रद्द झाले. या गटात उमेदवारच रिंगणात नाही. 

अविरोध ठरलेले संचालक
खासदार प्रतिभा धानोरकर, माजी अध्यक्ष संतोषसिंह रावत, रविंद्र शिंदे, संदीप गड्डमवार, संजय डोंगरे, डॉ. अनिल वाढई, गणेश तर्वेकर, आवेश पठाण, नागेश्वर ठेंगणे, विलास मोगरकर, नंदा अल्लूरवार, शेखर धोटे, दामोदर मिसार आदी एकूण १३ उमेदवार संचालकपदी अविरोध ठरले आहेत. आता वरोरा, चंद्रपूर व सिंदेवाही येथे अट गट, ओबीसी, एससी-एसटी, एनटी व ब २ गट या सात जागांसाठी निवडणूक होईल.

भाजपचा सहा संचालकांवर दावा, रावत गटाचा नऊ सदस्यांवर दावा
जिल्हा बँकेच्या निवडणुकीत १३ जण अविरोध निवडून आले. यामध्ये सहाजण भाजपचे असल्याचा दावा चंद्रपूरचे आमदार किशोर जोरगेवार यांनी 'लोकमत'जवळ केला. मात्र त्यांनी नावे देण्यास असमर्थता दर्शविली. उमेदवारी घेण्याच्या अखेरच्या दिवशी अनेक नाट्यमय घडामोडी झाल्या. जिल्हा बँकेत आघाडीबाबत बरीच राजकीय खलबते झाली. यामध्ये नेमके काय घडले, यावर कुणीही भाष्य केले नाही. या बैठकीत खासदार प्रतिभा धानोरकर, आमदार बंटी भांगडिया, माजी आमदार सुभाष धोटे, संतोषसिंह रावत यांच्यासह आजी-माजी संचालक उपस्थित होते. यावेळी आघाडीवरून चांगलीच रस्सीखेच झाल्याची माहिती आहे. नऊ जागांवर आपले संचालक अविरोध निवडून आल्याचा दावा रावत गटाकडून करीत आहे.

११ जुलैला होणार मतदान
उमेदवारांची अंतिम यादी ३० जून रोजी जाहीर होईल. १० जुलैला मतदान व ११ जुलैला मतमोजणी व निकाल जाहीर होणार आहे.

विलास मोगरकारांच्या संघर्षाचा शानदार विजय
जिल्हा मध्यवर्ती बँकेत पोंभुर्णा तालुक्यातील देवाडा खुर्द या छोटाशा गावचे विलास मोगरकार हे अविरोध निवडून आले. सहकारी संस्थांच्या निवडणुकीपासून ते अविरोध निवडीपर्यंत त्यांना कमालीचा संघर्ष करावा लागला. मात्र त्यांनी कायदेशीर मार्ग पत्करून विरोधकांचे मुनसुबे धुळीस मिळविले. त्यांच्या विरोधकांनी त्यांना तेलंगणामध्ये घेरले होते. तेथील मुख्यमंत्री रेवंथ रेड्डी त्यांच्या मदतीला धावून आले आणि त्यांनी संचालक पदाच्या निवडणुकीची पहिली परीक्षा उत्तीर्ण केली. संचालक पदाच्या निवडणुकीत त्यांच्या विरोधकांनी निवडणूक प्रक्रियेचा चुकीचा अर्थ काढून त्यांच्या विरोधात दंड थोपटले. मात्र मोगरकारांनी हतबल न होता न्यायालयाचे दार ठोठावले. परिणामी न्यायालयाने त्यांच्या बाजूने निर्णय दिल्याने मोगरकार यांचा अविरोध विजयाचा मार्ग सुकर होऊन अखेर संघर्षाचा शेवट विजयात झाला.