Gold vs Real Estate : सध्या गुंतवणूकदारांसाठी बाजारात अनेक चांगले पर्याय उपलब्ध आहेत. यात सोनं आणि रिअल इस्टेट हे दोन प्रमुख आणि पारंपारिक पर्याय आहेत. गेल्या एका वर्षात या दोन्ही मालमत्तांच्या किमतीत मोठी वाढ झाली आहे. अशावेळी कोणत्या पर्यायात गुंतवणूक करून जास्तीत जास्त नफा कमावता येईल, हा प्रश्न अनेकांना पडतो. आर्थिक अनिश्चितता आणि मध्यवर्ती बँकांकडून सोन्याची सतत होणारी खरेदी यामुळे सोन्याची मागणी वाढून किंमती वाढल्या आहेत. दुसरीकडे, चांगल्या घरांना असलेली मागणी आणि लक्झरी सेगमेंटमधील वाढ यामुळे रिअल इस्टेटचे (स्थावर मालमत्ता) मूल्य देखील वाढले आहे.
१. सोन्यात गुंतवणूक करण्याचे फायदे
सोन्यातील गुंतवणुकीचा सर्वात मोठा फायदा म्हणजे ते सहज खरेदी किंवा विकले जाऊ शकते. कोणतीही अडचण न येता ते रोखीत रूपांतरित होते. आर्थिक अनिश्चिततेच्या काळात किंवा शेअर बाजारात मोठी घसरण झाल्यावर, सोनं सुरक्षित मालमत्ता म्हणून तुमच्या पोर्टफोलिओला मोठ्या नुकसानीपासून वाचवते. तुम्ही भौतिक सोन्यासोबतच डिजिटल गोल्ड किंवा डिजिटल गोल्डमध्येही गुंतवणूक करू शकता. सर्वात महत्त्वाचे म्हणजे, आणीबाणीच्या परिस्थितीत तुमच्याकडील सोनं त्वरित विकून तुम्ही तुमची आर्थिक गरज पूर्ण करू शकता.
२. रिअल इस्टेटमध्ये गुंतवणूक करण्याचे फायदे
रिअल इस्टेटमध्ये दीर्घकाळासाठी गुंतवणूक केल्यास मोठा नफा मिळतो. आगामी ८-१० वर्षांत दर्जेदार घरांची वाढती मागणी पाहता, या क्षेत्रात तेजी येण्याची शक्यता आहे. तुम्ही तुमच्या मालमत्तेला भाड्याने किंवा लीजवर देऊन नियमित उत्पन्न मिळवू शकता. कालांतराने तुम्ही भाडे देखील वाढवू शकता. तुम्ही ईएमआय भरून प्रॉपर्टी खरेदी करू शकता. काही वर्षांनी कर्ज फेडल्यावर, मालमत्ता पूर्णपणे तुमच्या नावावर होते आणि कालांतराने वाढलेल्या मालमत्तेच्या मूल्यातून तुम्हाला मोठा फायदा होतो. सुरुवातीला ईएमआयचा बोजा असतो, पण नंतर वाढलेले भाडे ईएमआयचा मोठा भाग कव्हर करू शकते.
३. कशात गुंतवणूक केल्यास जास्त फायदा? (तुमच्या गरजेनुसार निवड)
सोने आणि रिअल इस्टेट दोन्ही गुंतवणुकीसाठी उत्तम असले तरी, तुमचा गुंतवणुकीचा उद्देश काय आहे, यावर निवड अवलंबून असते.
| गुंतवणुकीचा उद्देश | सोन्यातील गुंतवणूक | रिअल इस्टेट |
| प्राथमिकता 'लिक्विडिटी' (रोख उपलब्धता) | सर्वात फायदेशीर: कधीही विकून लगेच पैसे मिळवता येतात. | कमी फायदेशीर: विक्री प्रक्रिया किचकट आणि वेळखाऊ असते. |
| प्राथमिकता 'दीर्घकालीन नफा' | चांगला फायदा: महागाई आणि अनिश्चिततेपासून संरक्षण. | उत्तम फायदा: मालमत्तेच्या वाढत्या मूल्यामुळे मोठा परतावा मिळतो. |
| उत्पन्नाची गरज | कमी फायदेशीर: नियमित उत्पन्न (व्याज वगळता) मिळत नाही. | सर्वात फायदेशीर: भाड्याच्या रूपात नियमित उत्पन्न मिळते. |
| कर्जाचा बोजा | बोजा नाही: कोणतीही नियमित परतफेडीची अट नसते. | बोजा असतो: दीर्घकाळ नियमित EMI भरण्याची जबाबदारी येते. |
- जर तुमच्या गुंतवणुकीची प्राथमिकता लिक्विडिटी (तत्काळ रोख) आणि आर्थिक सुरक्षीतता असेल, तर सोन्यात गुंतवणूक करणे अधिक सोयीचे आहे.
- जर तुम्हाला दीर्घकाळात मोठा नफा मिळवायचा असेल आणि नियमित भाड्याचे उत्पन्न हवे असेल, तर रिअल इस्टेट मध्ये गुंतवणूक करणे सर्वोत्तम आहे.
वाचा - भारताकडे 'रेअर अर्थ'चा ५वा सर्वात मोठा खजिना; तरीही आयातीसाठी चीनवर का अवलंबून? 'ही' आहे खरी अडचण
तुमच्या वयानुसार आणि जोखीम घेण्याच्या क्षमतेनुसार दोन्हीमध्ये काही प्रमाणात गुंतवणूक करणे हे संतुलित गुंतवणूक पोर्टफोलिओसाठी आदर्श मानले जाते.