Reliance AGM 2025 :मुकेश अंबानी कोणती मोठी घोषणा करणार, या प्रश्नाचे उत्तर जाणून घेण्यासाठी ४४ लाखाहून अधिक भागधारक आतुरतेने वाट पाहत आहेत. निमित्त आहे रिलायन्स इंडस्ट्रीजच्या वार्षिक सर्वसाधारण सभेचे (एजीएम), जी उद्या, २९ ऑगस्ट रोजी दुपारी २ वाजता सुरू होईल. या एजीएममध्ये शेअर बाजाराच्या इतिहासातील सर्वात मोठ्या आयपीओची घोषणा होऊ शकते, असा अंदाज वर्तवला जात आहे.
एकीकडे बाजारात घसरण होत असतानाही, जागतिक तज्ज्ञांनी रिलायन्सवर सकारात्मक भूमिका घेतली आहे. अनेक तज्ज्ञ संस्थांनी रिलायन्सच्या शेअरची लक्ष किंमत (टार्गेट प्राईस) १,५५० रुपयांपर्यंत वाढवली आहे. त्यांना विश्वास आहे की, कंपनीचे रिटेल आणि जिओसारखे वेगाने वाढणारे व्यवसाय भविष्यात मोठा नफा मिळवून देतील, ज्यामुळे शेअरच्या मूल्यात वाढ होईल.
एजीएममधून कोणत्या मोठ्या घोषणा अपेक्षित?
एजीएममधून कोणत्याही सकारात्मक बातमीमुळे रिलायन्सचा शेअर वेगाने वाढू शकतो, असे तज्ज्ञांचे मत आहे. रिलायन्सच्या एजीएममध्ये खालील ५ महत्त्वाच्या मुद्द्यांवर लक्ष केंद्रित केले जाईल.
- आयपीओबद्दल मोठी घोषणा: २०१९ मध्ये मुकेश अंबानींनी सांगितले होते की, पुढील ५ वर्षांत जिओ आणि रिटेल व्यवसायाचे आयपीओ आणले जातील. त्यानंतर याबाबत कोणतीही माहिती दिली गेली नाही. त्यामुळे या वेळी आयपीओच्या तारखेची किंवा योजनेची घोषणा होण्याची गुंतवणूकदारांना अपेक्षा आहे.
- एआय (AI) आणि 'जिओ ब्रेन'ची योजना: रिलायन्स आपल्या 'जिओ ब्रेन' या नवीन कृत्रिम बुद्धिमत्ता (AI) प्लॅटफॉर्मबद्दल माहिती देऊ शकते. जिओ आपल्या सर्व व्यवसायांमध्ये एआयचा वापर मोठ्या प्रमाणावर करण्याचा विचार करत आहे.
- नवी ऊर्जा व्यवसाय: रिलायन्सच्या नवी ऊर्जा (New Energy) प्रकल्पांवर मोठे अपडेट मिळण्याची शक्यता आहे. कंपनीच्या सौर आणि बॅटरी 'गिगा-फॅक्टरी'चे काम वेगाने सुरू असून, पुढील १ ते १.५ वर्षांत हे प्रकल्प सुरू होऊ शकतात, असा अंदाज आहे. यातून कंपनीचा नफा वाढण्यास मदत होईल.
- जिओ आणि रिटेलची वाढ: २०२४ च्या एजीएममध्ये अंबानींनी २०३० पर्यंत जिओ आणि रिटेल व्यवसाय दुप्पट करण्याचे उद्दिष्ट ठेवले होते. या उद्दिष्टाच्या प्रगतीबद्दल या वेळी माहिती दिली जाईल.
- पेटकेम व्यवसायातील वाढ: जागतिक बाजारातील चढ-उतार असूनही रिलायन्सचा पेट्रोकेमिकल (पेटकेम) व्यवसाय मजबूत स्थितीत आहे. या विभागाच्या विस्ताराबद्दलही नवीन माहिती अपेक्षित आहे.
वाचा - विमाधारकांनो सावधान! पॉलिसी घेताना 'ही' चूक पडेल महागात! क्लेमचा एक पैसाही मिळणार नाही!
शेअर खरेदी करायचा की नाही?
अनेक तज्ज्ञांनी रिलायन्स इंडस्ट्रीजच्या शेअर्सवर 'खरेदी'चा सल्ला दिला आहे. त्यांचे म्हणणे आहे की, मुकेश अंबानींच्या २०२९ पर्यंत कंपनीचा नफा दुप्पट करण्याच्या योजनेमुळे शेअरमध्ये मोठी क्षमता आहे. अलीकडच्या काही दिवसांत शेअरची कामगिरी काहीशी कमजोर असली तरी, कंपनीच्या व्यवसायातील बदलांमुळे पुढील १२ ते १८ महिन्यांत शेअरमध्ये चांगली वाढ होण्याची शक्यता आहे.
(टीप - यामध्ये सामान्य माहिती देण्यात आलेली आहे. हा गुंतवणूकीचा सल्ला नाही. शेअर बाजारातील गुंतवणूक जोखमीच्या अधीन असते. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)