tesla electric car : अब्जाधीश इलॉन मस्क आपली इलेक्ट्रीक टेस्ला कार भारतात आणण्यासाठी उतावीळ झाले आहेत. काही दिवसांपूर्वी टेस्ला कंपनीने भारतात नोकर भरती केली. टेस्ला कार पुढील महिन्यापासून भारतीय बाजारपेठेत उपलब्ध होऊ शकतात. सध्या कंपनी भारतात कार आयात करूनच विकणार आहे. पण, भारतीय बाजारपेठ काबिज करण्यासाठी मस्क यांना परवडणाऱ्या दरात कार विक्री करावी लागेल. यासाठी कारची भारतात निर्मिती करण्यासाठी चाचपणी सुरू आहे. असे झाल्यास भारतीयांना स्वस्तात टेस्ला विकत घेता येईल.
टेस्ला कंपनी भारतात कंपनी उभारणार?
देशात कार निर्मिती करणाऱ्या कंपन्या आपल्या कारखान्यात दरवर्षी एकूण ६२ लाख वाहनांचे उत्पादन करू शकतात. पण, सध्या त्यातील केवळ ७५% उत्पादन केले जाते. अशा परिस्थितीत, इलॉन मस्क यांची टेस्ला सुरुवातीस केवळ उर्वरित २५% क्षमतेचा वापर करण्यासाठी कंत्राटी उत्पादनाचा पर्याय शोधत आहे. पण खऱ्या अर्थाने पाहिले तर टेस्लाला भारतात गिगाफॅक्टरी उभारणे फायदेशीर ठरू शकते.
टेस्ला भारतात किती स्वस्त होईल?
टेस्लाच्या सध्या जगात ५ गिगाफॅक्टरी आहेत. यापैकी ३ अमेरिकेत, एक जर्मनी आणि एक चीनमध्ये आहे. मेक्सिकोमध्ये गिगाफॅक्टरी उभारण्याचीही कंपनीची योजना आहे. ईटीच्या बातमीनुसार, टेस्लाने भारतात ५ लाख युनिट्सचे वार्षिक उत्पादन असलेली गिगाफॅक्टरी उभारली तर ती अमेरिका आणि जर्मनीच्या तुलनेत खूपच स्वस्त असेल. त्यामुळे त्याचा उत्पादन खर्चही कमी होईल. जर्मनीतील बर्लिन येथे या क्षमतेची गिगाफॅक्टरी उभारल्यास त्याची किंमत ५ अब्ज डॉलर्सपर्यंत असेल. तर अमेरिकेतील टेक्सासमध्ये त्याची किंमत ७ अब्ज डॉलर्सपर्यंत पोहोचेल. तर भारतात त्याची किंमत फक्त २ ते ३ अब्ज डॉलर्स असेल.
कंपनी केवळ फॅक्टरी खर्चातच नाही तर मजुरीच्या खर्चातही बचत करेल. भारतातील मजुरीची किंमत प्रति तास २ ते ५ डॉलर (जास्तीत जास्त ५०० रुपये) असेल. तर अमेरिकेत ते प्रति तास ३६ डॉलर आणि जर्मनीमध्ये ते प्रति तास ४५ डॉलरवर जाईल. दुसरीकडे, कंपनीने भारतातच कार बनवल्यास पुरवठा साखळीचा फायदा, मोठ्या ग्राहक बाजारपेठेचा फायदा आणि काही वर्षांसाठी सरकारकडून मिळणाऱ्या कर सूटचा फायदाही मिळेल.
वाचा - २ एप्रिलपासून भारतावर ट्रम्प टॅरिफ लागू होणार? 'या' शेअर्सवर दिसू शकतो मोठा परिणाम
कॉन्ट्रॅक्ट मॅन्युफॅक्चरिंगचे तोटे
टेस्लाने कॉन्ट्रॅक्ट मॅन्युफॅक्चरिंगचा मार्ग स्वीकारला तर तिला अनेक नुकसान सहन करावे लागू शकते. यामुळे पुरवठा साखळीवर त्यांचे नियंत्रण राहणार नाही. आणि त्याच्या वितरण टाइमलाइनवर परिणाम होईल. एवढेच नाही तर त्याची किंमतही जास्त असेल. तर भविष्यात कारखाना सुरू केला तर शून्यातून सुरुवात करावी लागेल.