मच्छिंद्र देशमुख
शेती हा तोट्याचा व्यवसाय आहे. असे सर्वश्रुत आहे. मात्र खडकाळ माळरानावर कोतूळात शेतकऱ्याने दीड एकरात बाजरीचे बहारदार पीक घेतले आहे. चक्क दीड फूट उंचीची कणसे लागली आहेत.
कोतूळ येथील शेतकरी रावसाहेब रामनाथ खतोडे यांच्याकडे तीस संकरीत गायींचा गोठा आहे. पशुखाद्याचे वाढते भाव दूध धंद्यात न परवडणारे आहे.
यावर उपाय म्हणून त्यांनी पशुखाद्यासाठी धान्य व चारा म्हणून बाजरीचेपीक घेतले. अत्यंत खडकाळ माळरानावर उन्हाळी हंगामातील वाण पहिल्यांदा पेरले आहे.
खतोडे उच्चशिक्षित असल्याने पेरणी व साठ दिवसांत चार वेळा पाणी दिले. सध्या बाजरीचे पीक साडेचार फूट उंच व कणीस दीड दोन फूट लांब आहे. अजून एक महिन्यात पीक काढणीस तयार होईल.
सदर बाजरी पिकातून धान्य व इतर भागांचा मुरघास बनवयायचा आहे. त्यामुळे पशुखाद्य व चारा असा दुहेरी प्रश्न सुटणार आहे. या माळरानावर हे पीक ये-जा करणाऱ्यांना आकर्षित करीत आहे.
बाजरीत आर्यन, कॅल्शिअम फायबर ही पोषणमूल्य आहेत. मिलेटस म्हणून केंद्र व राज्य सरकार या उत्पादनाला प्रोत्साहन देते आहे. ज्यांना उन्हाळी हंगामात पाणी देण्याची सोय आहे. त्यांनी या पिकाकडे निश्चित वळावे. मी स्वतः खतोडे यांच्या बाजरी क्षेत्रात भेट देणार आहे. - अतुल पवार, तालुका कृषी अधिकारी
अधिक वाचा: पावसाचे निसर्ग संकेत; वाचा निसर्गातील कोणकोणते सजीव कसे देतात पाऊस येण्याचे संकेत?