मँचेस्टर, आयसीसी वर्ल्ड कप 2019 : दमदार फलंदाजी आणि भेदक गोलंदाजीच्या जोरावर भारतानेवेस्ट इंडिजवर दममाखदार विजय मिळवला. या विजयासह भारतीय संघ 11 गुणांसह उपांत्य फेरीच्या उंबरठ्यावर येऊन पोहोचला आहे. कर्णधार विराट कोहली आणि महेंद्रसिंग धोनी यांच्या अर्धशतकांच्या जोरावर भारताने 268 धावांपर्यंत मजल मारली होती. या आव्हानाचा पाटलाग करताना वेस्ट इंडिजचे फलंदाज मोहम्मद शमी आणि जसप्रीत बुमरा यांच्या वेगवान गोलंदाजीचे शिकार ठरले. भारताच्या अचूक गोलंदाजीमुळे वेस्ट इंडिजला भारताचे आव्हान पेलवले नाही आणि त्यांना पराभव पत्करावा लागला. या सामन्यात भारताने वेस्ट इंडिजवर 125 धावांनी दणदणीत विजय मिळवला.
या सामन्यात यष्टिरक्षक महेंद्रसिंग धोनीनं 27व्या षटकात अप्रतिम झेल टिपला. वेस्ट इंडिजच्या कार्लोस ब्रॅथवेटचा तो झेल होता. जसप्रीत बुमराहनं टाकलेल्या चेंडूचा अंदाज बांधण्यात ब्रॅथवेट अपयशी ठरला आणि चेंडू बॅटची किनार घेत धोनीच्या दिशेनं वेगानं गेला, धोनीनं चपळाईनं उजव्या दिशेला डाईव्ह मारत चेंडू झेलला आणि ब्रॅथवेटला माघारी जावं लागलं. धोनीच्या या डाईव्हवर कर्णधार विराट कोहलीलाही अवाक् केलं.
![]()
भारतीय संघाने वेस्ट इंडिजला नमवून उपांत्य फेरीच्या दिशेनं पाऊल टाकले आहे. त्यामुळे उर्वरित तीन सामन्यांत त्यांना एक विजय पुरेसा आहे. भारताला उर्वरित लढतीत यजमान इंग्लंड, श्रीलंका आणि बांगलादेश यांचा सामना करावा लागणार आहे. येत्या रविवारी त्यांचा सामना इंग्लंडशी आहे आणि इंग्लंडसाठी हा सामना करो वा मरो असाच आहे. त्यामुळे या लढतीत इंग्लंड विजयासाठी स्वतःला झोकून देतील, हे निश्चित आहे.
![]()
काही दिवसांपूर्वी न्यूझीलंडविरुद्धच्या सामन्यातही पाकिस्तानचा कर्णधार व यष्टिरक्षक सर्फराज अहमदने असाच झेल टिपला होता. रॉस टेलरच्या त्या झेलनंतर सर्फराजचे कौतुकही झाले होते. आंतरराष्ट्रीय क्रिकेट परिषदेनं धोनी आणि सर्फराज यांच्या त्या झेलचा व्हिडीओ शेअर केला आणि यापैकी सर्वोत्तम झेल कोणता असा सवाल केला. त्यावरून धोनी व सर्फराज यांच्या चाहत्यांमध्ये सोशल मीडियावर चांगलीच जुंपली.
Web Title: ICC World Cup 2019 : Dive and conquer, who did it better, Ms Dhoni vs Sarfraz Ahmed?, ICC ask question
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
