Budget 2023: नोकरदार वर्गासाठी बजेटमध्ये मिळणार आनंदाची बातमी; किती पैसे वाचणार? बघा

केंद्रीय अर्थमंत्री निर्मला सितारामन १ फेब्रुवारी २०२३ रोजी अर्थसंकल्प सादर करणार आहे. यंदाच्या अर्थसंकल्पातून सर्वसामान्यांना मोठा दिलासा मिळेल अशी अपेक्षा आहे. त्याचसोबत या वर्षी कर्मचाऱ्यांना अर्थसंकल्पातून मोठी भेट मिळण्याची शक्यता आहे.

केंद्रीय अर्थसंकल्पातून सरकार नोकरदारांना मिळणाऱ्या ८० सी अंतर्गत करातील सूटची मर्यादा वाढवू शकते. नोकरदार करदात्यांना कलम ८० सीनुसार करात सूट दिली जाते. त्यामुळे कर वाचवण्यासाठी हा सर्वात महत्त्वाचा घटक आहे.

कलम ८० सी मधील मर्यादा वाढवणे म्हणजे बहुतांश नोकरदारांना दिलासा मिळण्याची शक्यता आहे. आता कलम ८० C अंतर्गत उपलब्ध सूट १.५ लाख रुपये आहे. २०२३ च्या अर्थसंकल्पात कलम 80C अंतर्गत सरकार कपातीची मर्यादा २ लाखांपर्यंत वाढवणार असल्याची चर्चा आहे.

सरकार थेट कपातीची मर्यादा ५० हजार रुपयांनी वाढवू शकते. त्यामुळे पगारदार वर्गाला दिलासा मिळू शकतो. जर तुमचा वार्षिक पगार १० लाख रुपये असेल तर कर कपातीची मर्यादा वाढवल्याने तुमचे किती पैसे वाचू शकतात हे जाणून घेऊया.

भारतीय आयकर कायद्याचे कलम ८० सी आणि त्याच्याशी संबंधित विभाग ८० CCC, ८० CCD आहेत. या अंतर्गत कोणत्याही व्यक्तीला एका आर्थिक वर्षात १.५ लाख रुपयांपर्यंत कर सूट मिळू शकते. ही सूट कंपनी, कॉर्पोरेट आणि भागीदारी इत्यादींमध्ये मिळत नाही.

या सूटसाठी तुम्ही दरवर्षी ३१ जुलैपूर्वी आयकर रिटर्न भरू शकता. कलम ८०सी म्युच्युअल फंड, प्रीमियम इन्शुरन्स टॅक्स- सेव्हर फिक्स्ड डिपॉझिट्स, पब्लिक प्रॉव्हिडंट फंड (पीपीएफ) इत्यादी सेवांचा समावेश करते.

पेन्शन आणि अॅन्युइटी देणाऱ्या काही पॉलिसी कलम ८० CCC अंतर्गत येतात. इंडियन पेन्शन सिस्टम (NPS) ८० CCD अंतर्गत येते. यावेळी सरकार केंद्रीय अर्थसंकल्पात पगारदारांना खूश करण्याची तयारी करत असल्याची जोरदार चर्चा आहे.

२०२३ च्या अर्थसंकल्पात सरकार कलम ८०C अंतर्गत कपातीची मर्यादा वार्षिक २ लाख रुपये करू शकते. असे झाल्यास पगारदारांचे किती पैसे वाचतील? हे अशा प्रकारे समजून घ्या की तुम्ही या कलमाद्वारे जी काही रक्कम दावा करता, ती तुमच्या एकूण उत्पन्नातून कमी केली जाते.

आता जर कोणाचा एकूण पगार १० लाख रुपये आहे. यापैकी प्रत्येकाला अडीच लाख रुपयांची करसवलत मिळते. ५०००० स्टँडर्ड डिडक्शन वजा केले जाते. अशावेळी करपात्र उत्पन्न ७ लाख रुपये आहे. आता जर तुम्ही कलम ८०C द्वारे १.५ लाख रुपयांच्या कपातीचा दावा केला तर तुमचे करपात्र उत्पन्न (करपात्र) रुपये ५.५ लाख होईल.

दुसरीकडे, कपातीची मर्यादा १.५ लाख रुपयांवरून २ लाख रुपयांपर्यंत वाढवल्यास, कलम ८०C द्वारे २ लाख रुपयांच्या कपातीचा दावा केला जाईल. या प्रकरणात, १० लाख रुपये पगार असलेल्या व्यक्तीचे करपात्र उत्पन्न ५ लाख रुपये असेल.

सध्याच्या आयकर स्लॅबमध्ये २.५ ते ५ लाख वार्षिक उत्पन्नावर ५% कर आकारला जातो. अशा परिस्थितीत, कपातीची मर्यादा वाढवल्यास, १० लाख रुपये उत्पन्न असलेल्या पगारदार व्यक्तीसाठी २५०० रुपयांची अधिक बचत होईल.