Tunisha Sharma : टीव्ही अभिनेत्री तुनिषा शर्मा आत्महत्येप्रकरणी तुनिशाचा सहकलाकार शिझान खानची पोलिस कोठडी आज संपली.आज त्याला वसई कोर्टात हजर केले असता पोलिसांनी कोठडी वाढवून देण्याची मागणी केली. यावर कोर्टाने शिझान खानच्या पोलिस कोठडीत आणखी २ दिवसांची वाढ केली आहे. ३० डिसेंबरपर्यंत त्याची पोलिस कोठडी वाढवण्यात आली आहे.
पुढील २ दिवस म्हणजेच ३० डिसेंबर पर्यंत शिझान खान पोलिस कोठडीत असणार आहे. त्यामुळे चौकशीतून आणखी नवे खुलासे होण्याची शक्यता आहे. शिझान खानचे इतर मुलींबरोबर असलेले संबंध, तुनिशासह ब्रेकअप याबाबत अधिक माहिती समोर येईल.
तुनिशापासून दूर राहा...
तुनिशाच्या आईने अभिनेता शिजान खानवर गंभीर आरोप केले आहेत. शिजानमुळेच मुलगी तुनिशाने हे टोकाचे पाऊल उचलल्याचं त्यांनी पोलिसांना सांगितलं. तर तुनिशाने आत्महत्या केली त्याच्या एक दिवस आधीच तुनिशाची आई मालिकेच्या सेटवर आली होती. त्यांनी शिजान खानसोबत बराच वेळ चर्चा केली. तसंच तुनिशापासून दूर राहा असंही त्यांनी शिजानला ठणकावून सांगितलं.
पोलिसांचा तपास सुरु
तुनिशाने ३ वाजता सेटवरच शिजानसोबत जेवण केले आणि ३.१५ वाजता तिने आत्महत्या केली. मग मध्ये १५ मिनिटे नेमके काय घडले की तुनिशाने एवढे टोकाचे पाऊल उचलले याचा तपास पोलिस करत आहेत. तुनिशाच्या मोबाईलमधून अनेक पुरावे हाती लागण्याचीही शक्यता आहे.