मानसी साळवीचा 'महादेव अँड सन्स'ला रामराम! निर्माते भडकले; अभिनेत्रीवर कायदेशीर कारवाई?

मानसी साळवीने का सोडली मालिका?

टीव्ही विश्वातील लोकप्रिय अभिनेत्री मानसी साळवीने आपल्या अभिनयाने प्रेक्षकांच्या मनात अढळ स्थान निर्माण केले आहे. सध्या ती 'महादेव अँड सन्स' या मालिकेत भानू वाजपेयी ही तडफदार भूमिका साकारत होती. मात्र, मानसीने अचानक ही मालिका सोडण्याचा निर्णय घेतल्याने चाहत्यांना मोठा धक्का बसला आहे. तिच्या या निर्णयामुळे मालिकेत मोठी पोकळी निर्माण झाली असून सोशल मीडियावर तिचे चाहते तिला परत येण्याची विनंती करत आहेत.

मानसीने ही मालिका का सोडली, यावर अद्याप तिने अधिकृत भाष्य केलेले नाही. मात्र, मालिकेचे निर्माते सौरभ तिवारी यांनी या प्रकरणावर आपली बाजू मांडली आहे. तिवारी यांच्या मते, मानसीला तिच्या 'वर्किंग डेज'मध्ये (कामाच्या दिवसांत) कपात झाल्यामुळे काही समस्या होत्या. डेली सोपमध्ये असे बदल होणे सामान्य असल्याचे सांगत निर्मात्यांनी त्यावर तोडगा काढण्याचे आश्वासन दिले होते, परंतु मानसीला मालिकेशी जोडले राहायचे नव्हते. तिने २० एप्रिल रोजी ईमेलद्वारे आपला राजीनामा सोपवला आणि १५ मे हा आपला कामाचा शेवटचा दिवस असेल असे कळवले.

निर्मात्यांनी मानसीच्या या भूमिकेवर तीव्र नाराजी व्यक्त केली असून तिच्यावर कायदेशीर कारवाई करण्याचे संकेत दिले आहेत. सौरभ तिवारी म्हणाले की, मानसीने आमच्यासोबत केलेल्या कराराचे उल्लंघन केले आहे. करारानुसार तिला सहा महिन्यांचा 'नोटीस पिरीयड' देणे बंधनकारक आहे, जो २० एप्रिलपासून सुरू होतो. कोणत्याही कलाकाराला अशा प्रकारे अचानक मालिका सोडता येत नाही. एक्झिट डेट ही दोन्ही पक्षांच्या संमतीने ठरवली जाते, केवळ एका व्यक्तीच्या निर्णयावर नाही.

कायदेशीर आणि व्यावसायिक दृष्टिकोनातून इतक्या कमी वेळात शो सोडणे चुकीचे असल्याचे प्रोडक्शन हाऊसचे म्हणणे आहे. क्रिएटिव्ह गरजा लक्षात घेता तिची एक्झिट सध्या तरी केवळ परस्पर संमतीनेच शक्य आहे. जर ती कराराच्या विरोधात गेली, तर प्रोडक्शन हाऊस कायदेशीर पाऊल उचलण्यास मागे हटणार नाही, असा इशाराच निर्मात्यांनी दिला आहे. आता या वादावर मानसी सल्वी काय उत्तर देते, याकडे सर्वांचे लक्ष लागले आहे.