मनोरंजन विश्वातून एक दुःखद बातमी समोर येत आहे. एका ३७ वर्षीय प्रसिद्ध अभिनेत्याचं निधन झालंय. हा अभिनेता आहे अ‍ॅलन यू मेंगलोंग. सुप्रसिद्ध चिनी अभिनेता, गायक आणि मॉडेल अ‍ॅलन यू मेंगलोंग (Alan Yu Menglong) याचे ३७ व्या वर्षी बीजिंगमध्ये एका इमारतीवरून पडून निधन झाले. ११ सप्टेंबर २०२५ रोजी ही दुर्दैवी घटना घडली. अ‍ॅलनच्या व्यवस्थापन टीमने त्यांच्या अधिकृत अकाऊंटवरून एक निवेदन जारी करून ही दुःखद बातमी सर्वांसोबत शेअर केली. गायकाचं ३७ व्या वर्षी दुःखद निधन
अभिनेता - गायक अ‍ॅलनच्या व्यवस्थापन टीमने या निवेदनात म्हटले आहे की, "अत्यंत दुःखद भावनेने आम्ही जाहीर करतो की, आमचा प्रिय अ‍ॅलन मेंगलोंगचे ११ सप्टेंबर रोजी निधन झाले. पोलिसांच्या तपासणीनुसार, या घटनेत कोणताही गुन्हेगारी कट नसल्याचे स्पष्ट झाले आहे. त्याच्या आत्म्यास शांती लाभो, अशी आम्ही आशा करतो. अ‍ॅलनच्या चाहत्यांनी आणि कुटुंबियांनी या कठीण एकमेकांना साथ द्यावी."
अ‍ॅलन यू मेंगलोंग विषयी थोडक्यात
अ‍ॅलन यू मेंगलोंग बद्दल सांगायचं तर त्याचा जन्म १५ जून १९८८ रोजी झाला. २००७ मध्ये 'माय शो, माय शो स्टाइल' या टॅलेंट रिअॅलिटी शोमधून अ‍ॅलन यू मेंगलोंगने त्याच्या करिअरची सुरुवात केली. पुढे २०११ साली 'द लिटल प्रिंस' या गाजलेल्या शॉर्ट फिल्ममधून अ‍ॅलनने अभिनय कारकीर्दीला सुरुवात केली.
याशिवाय 'गो प्रिन्सेस गो' (Go Princess Go) आणि 'इटरनल लव्ह' (Eternal Love) यांसारख्या लोकप्रिय चायनीज वेबसीरिजमध्ये (C-drama) त्याच्या उत्तम अभिनयासाठी तो ओळखला जात होता. अ‍ॅलनच्या दुर्दैवी अपघाती निधनाने त्याचे चाहते आणि इंडस्ट्रीतील त्याच्या सहकाऱ्यांना मोठा धक्का बसला आहे. अनेक चाहत्यांनी सोशल मीडियावर त्याला भावूक श्रद्धांजली वाहिली आहे.