"तुम्हाला पडद्यावर शेवटचं पाहणं खूप कठीण..."; धर्मेंद्र यांचा 'इक्कीस' पाहून सनी-बॉबी देओल झाले भावुक

धर्मेंद्र यांचा शेवटचा सिनेमा बघून बॉबी आणि सनी देओल चांगलेच भावुक झाले आहेत. दोघांनीही खास पोस्ट करुन वडिलांना आदरांजली वाहिली आहे

बॉलीवूडचे दिग्गज अभिनेते धर्मेंद्र यांचा शेवटचा चित्रपट 'इक्कीस' (Ikkis) आज रिलीज झाला आहे. यानिमित्त धर्मेंद्र यांची दोन्ही मुलं सनी देओल आणि बॉबी देओल यांनी सोशल मीडियावर अत्यंत हृदयस्पर्शी पोस्ट शेअर केल्या आहेत. आपल्या वडिलांच्या आठवणीत भावुक होत या दोघांनीही धर्मेंद्र यांच्या प्रवासाला आणि त्यांच्या शेवटच्या चित्रपटाला सलाम केला आहे.

सनी देओलची भावनिक पोस्ट

सनी देओलने 'इक्कीस' चित्रपटाचे एक पोस्टर शेअर करताना लिहिले की, "बाबा, हा केवळ तुमचा चित्रपट नाही, तर तो तुमचा वारसा आहे. याशिवाय तुमची आवड आहे जी तुम्ही शेवटपर्यंत जपली. तुम्हाला पडद्यावर शेवटचं पाहणं माझ्यासाठी खूप कठीण आणि त्याच वेळी अभिमानाचे आहे. तुम्ही आमच्यासाठी नेहमीच सुपरस्टार आणि आमचे प्रेरणास्थान असाल. 'इक्कीस' ही तुम्हाला दिलेली आमची छोटीशी मानवंदना आहे."

बॉबी देओलने व्यक्त केल्या भावना

दुसरीकडे बॉबी देओलनेही आपल्या भावनांना वाट मोकळी करून दिली. त्याने लिहिले, "पप्पा, तुम्ही ज्या उत्साहाने या चित्रपटाचे चित्रीकरण केले, ते पाहून आम्हाला नेहमीच आश्चर्य वाटायचे. तुमच्या शेवटच्या चित्रपटाचे प्रमोशन करताना मन भरून येत आहे. तुमच्याशिवाय हा प्रवास अपूर्ण आहे, पण तुम्ही तुमच्या कलेच्या माध्यमातून कायम आमच्यासोबत आणि प्रेक्षकांच्या मनात राहाल. आम्ही तुमच्यावर खूप प्रेम करतो."

सिनेविश्वातील शेवटचे योगदान

धर्मेंद्र यांचे २४ नोव्हेंबर २०२५ रोजी निधन झाले. 'इक्कीस' या चित्रपटात त्यांनी एका महत्त्वाच्या भूमिकेद्वारे आपल्या अभिनयाची छाप पाडली आहे. या चित्रपटाचे दिग्दर्शन श्रीराम राघवन यांनी केले असून यात अमिताभ बच्चन यांचा नातू अगस्त्य नंदा मुख्य भूमिकेत आहे. चित्रपटाच्या विशेष स्क्रीनिंगवेळी संपूर्ण देओल परिवार एकत्र दिसला होता, जिथे सनी आणि बॉबी आपल्या वडिलांच्या आठवणीत अश्रू अनावर करू शकले नाहीत.