ग्रँड फिनालेआधीच 'बिग बॉस १९'मधून 'या' दोन स्पर्धकांचा पत्ता कट? घरात झालं डबल एविक्शन

ग्रँड फिनालेला अवघा एक आठवडा बाकी असताना 'बिग बॉस १९'मधून डबल एविक्शन झालं आहे. त्यामुळे सर्वांना चांगलाच धक्का बसला आहे

लोकप्रिय रिॲलिटी शो 'बिग बॉस १९'चा ग्रँड फिनाले अवघ्या एका आठवड्यावर आला आहे. नुकतंच कुनिका सदानंद घराबाहेर पडल्यानंतर, आता 'वीकेंड का वार'मध्ये स्पर्धकांना दुहेरी धक्का बसण्याची शक्यता आहे. या आठवड्यात अशनूर कौर आणि शहनाज गिलचा भाऊ शहबाज बदेशा हे दोघेही शोमधून बाहेर पडल्याची जोरदार चर्चा आहे.

अशनूर कौरलासलमान खानची फटकार

'बिग बॉस १९' च्या घरातून अशनूर कौर बाहेर पडणार असल्याची दाट शक्यता आहे. नुकताच शोचा नवा प्रोमो रिलीज झाला होता, ज्यात होस्ट सलमान खान अशनूरला चांगलंच झापताना दिसतोय. एका टास्कदरम्यान अशनूरने तान्या मित्तलला लाकडी फळीने मारण्याचा प्रयत्न केला होता, शारीरिक हिंसेच्या याच मुद्द्यावरून सलमान खानने तिची चांगलीच शाळा घेतली. त्यामुळे समोर आलेल्या प्रोमोतून अशनूरचा प्रवास संपणार असल्याची चर्चा आहे. 

शहबाज बदेशाला मिळाले सर्वात कमी व्होट्स

अशनूरसोबतच आणखी एका सदस्याचा प्रवास या आठवड्यात संपुष्टात येणार असल्याची चर्चा आहे. 'बिग बॉस खबरी' या पेजनुसार, शहनाज गिलचा भाऊ शहबाज बदेशा या आठवड्यात घरातून बेघर होणार आहे. शहबाजला कमी वोट्स मिळाल्यामुळे त्याला शोमधून बाहेर पडावे लागेल. म्हणजेच, मतदानाच्या आधारावर शहबाज बदेशाचे एलिमिनेशन होणार आहे. याचा अधिकृत निर्णय सलमान खान 'वीकेंड का वार'मध्ये जाहीर करेल.

टॉप ६ स्पर्धक

या आठवड्यात गौरव खन्नाने 'तिकीट टू फिनाले' टास्क जिंकून शोचा पहिला फाइनलिस्ट बनून स्वतःला नॉमिनेशनमधून वाचवले आहे. गौरव वगळता घरातील सर्व सदस्य नॉमिनेट झाले होते. अशनूर आणि शहबाज यांच्या एलिमिनेशननंतर आता गौरव खन्ना, फरहाना भट्ट, मालती चहर, प्रणित मोरे, अमाल मलिक आणि तान्या मित्तल हे सहा स्पर्धक 'बिग बॉस १९' च्या घरात राहतील, जे आता ग्रँड फिनालेच्या शर्यतीत असतील.

कोण ठरणार विजेता?

ग्रँड फिनाले जवळ येत असताना, 'बिग बॉस १९' च्या विजेतेपदावर कोण नाव कोरणार, याबद्दल उत्सुकता वाढली आहे. सध्याच्या वोटिंग ट्रेंड्सनुसार प्रणित मोरे सर्वाधिक वोट्स मिळवून पहिल्या क्रमांकावर आहे, त्यानंतर तान्या मित्तल, फरहाना भट्ट आणि गौरव खन्ना यांचा क्रमांक लागतो आहे. तर मालती चाहर आणि अमाल मलिक बॉटम २ मध्ये आहेत. त्यामुळे अंतिम विजेता कोण असेल हे ग्रँड फिनालेमध्ये पाहणं रंजक ठरणार आहे.