Stock Markets Down: घरगुती शेअर बाजारात आज आठवड्याच्या शेवटच्या दिवशीही मोठ्या विक्रीसह व्यवहाराची सुरुवात झाली. बाजार उघडताच सेन्सेक्स ६०० अंकांच्या घसरणीसह व्यवहार करताना दिसला. निफ्टीदेखील १८० अंकांच्या घसरणीसह २३,५०० च्या खाली आला होता. बँक निफ्टी ५०० हून अधिक अंकांनी घसरून ५४,५०० च्या आसपास होता, तर India VIX मध्ये १.४% ची वाढ नोंदवण्यात आली. मिडकॅप आणि स्मॉलकॅप इंडेक्समध्येही प्रत्येकी १-१ टक्क्यांची घसरण पाहायला मिळत होती.
सकाळी ९:२८ वाजता सेन्सेक्स ५६६ अंकांनी घसरून ७५,४६७ वर, तर निफ्टी १७० अंकांनी घसरून २३,४६६ वर व्यवहार करत होता. बँक निफ्टी ५८४ अंकांनी घसरून ५४,५३५ वर आला होता.
सरकार म्हणतं एलपीजी कमतरताच नाही, दुसरीकडे बाजारातून इंडक्शनही होताहेत गायब; नक्की चाललंय काय?
प्रमुख शेअर्सची स्थिती
आजच्या घसरणीच्या वातावरणात केवळ FMCG क्षेत्रातील शेअर्समध्ये तेजी पाहायला मिळाली. निफ्टी ५० मधील टॉप गेनर्समध्ये HUL, नेस्ले, पॉवर ग्रिड, आयटीसी, सन फार्मा, बजाज फायनान्स, टाटा कंझ्युमर, भारती एअरटेल आणि एनटीपीसी यांसारख्या शेअर्सचा समावेश होता.
दुसरीकडे, हिंदाल्को, एल अँड टी, टाटा स्टील, अल्ट्राटेक सिमेंट, टेक महिंद्रा आणि इंडिगो या शेअर्समध्ये सर्वाधिक घसरण झाली. मेटल, आयटी, मीडिया, पीएसयू बँक आणि प्रायव्हेट बँक इंडेक्समध्ये मोठी घसरण दिसून आली, तर एफएमसीजी हा एकमेव इंडेक्स ग्रीन झोनमध्ये होता.
घसरणीमागची कारणं काय?
जागतिक तणाव आणि कच्च्या तेलाच्या वाढत्या किमतींयामुळे बाजारासमोर अनेक आव्हाने उभी आहेत. पश्चिम आशियातील बिघडत चाललेल्या परिस्थितीचा थेट परिणाम कमोडिटी मार्केट, जागतिक इक्विटी आणि चलन बाजारावर होत आहे. यासोबतच परदेशी गुंतवणूकदारांकडून (FIIs) होत असलेली सलग विक्री आणि महागाईची आकडेवारी यामुळे बाजारातील गुंतवणुकीचे वातावरण कमकुवत झालंय. आजच्या व्यवहारादरम्यान या प्रमुख घटकांकडे गुंतवणूकदारांचे बारीक लक्ष असेल.