Reliance Industries Shares : शेअर बाजारात सध्या सापशिडीचा खेळ सुरू आहे. कधी बाजार वर जाईल अन् कधी शेपटीतून खाली येईल काही सांगता येत नाही. सोमवारी जोरदार आपटल्यानंतर मंगळवारी चांगली रिकव्हरी झाली होती. मात्र, हा आनंद फार काळ टिकला नाही. शेअर बाजारात एका दिवसाच्या वाढीनंतर बुधवारी पुन्हा घसरण झाली. BSE सेन्सेक्स ४०० हून अधिक अंकांनी घसरला आहे. दरम्यान, मुकेश अंबानी यांची कंपनी रिलायन्स इंडस्ट्रीज (RIL) च्या शेअर्समध्ये २ टक्क्यांहून अधिक वाढ झाली आहे.
देशातील सर्वात मौल्यवान कंपनीचे शेअर्स बीएसईवर ट्रेडिंग दरम्यान २.१० टक्क्यांनी वाढून १२६९.८५ रुपयांवर पोहोचले. जागतिक ब्रोकरेज फर्म बर्नस्टीन आणि जेफरीजने सांगितले की कंपनीच्या स्टॉकमध्ये ३६.२% वाढ होण्याची अपेक्षा आहे. त्याचा ५२ आठवड्यांचा उच्चांक १,६०८.९५ रुपये आहे. जुलैमधील त्याच्या उच्चांकापासून ते सुमारे २२ टक्क्यांनी घसरले आहे. १० वर्षांत प्रथमच, या स्टॉकने २०२४ मध्ये नकारात्मक परतावा दिला.
रिलायन्सच्या शेअरहोल्डर्ससाठी एक आनंदाची बातमी
नवीन वर्षात रिलायन्सच्या शेअरहोल्डर्ससाठी एक आनंदाची बातमी आहे. जेफरीज आणि बर्नस्टीन म्हणतात की सध्या हा स्टॉक कमी किमतीत विकला जात आहे. पण, येत्या काही दिवसांत त्यात लक्षणीय वाढ होऊ शकते. जेफरीजने रिलायन्ससाठी आपले बाय रेटिंग कायम ठेवले असून टार्गेट प्राईज १,६९० रुपये ठेवली आहे. बर्नस्टीनने RIL साठी त्यांचे उत्कृष्ट कामगिरी रेटिंग देखील कायम ठेवले आहे. तर लक्ष्य किंमत १,५२० रुपये ठेवली आहे. RIL चे सध्याचे मूल्यांकन मार्च २०२० नंतरचे सर्वात कमी आहे. कॅलेंडर वर्ष २०२४ मध्ये, या स्टॉकने निफ्टी निर्देशांकापेक्षा १५% कमी परतावा दिला. त्यामुळे गुंतवणूकदारांची चिंता वाढली आहे.
रिलायन्सचा शेअर वाढणार?
बर्नस्टीन म्हणाले की, रिलायन्स जिओचा सरासरी महसूल (ARPU) नजीकच्या भविष्यात १२% वाढण्याची शक्यता आहे. त्याचप्रमाणे, किरकोळ विभागाला दुहेरी अंकी EBITDA वाढ अपेक्षित आहे. यामुळे रिलायन्सची आर्थिक कामगिरी आणखी मजबूत होईल. FY2024 मध्ये ग्रॉस रिफायनिंग मार्जिन ९ डॉलर प्रति बॅरलपर्यंत घसरल्यानंतर शुद्धीकरण व्यवसायातील वाढ अपेक्षित आहे. रिलायन्स इंडस्ट्रीजचे शेअर्स १.९% वाढून १,२४०.९० वर बंद झाले.