Share Market Today: शेअर बाजारासाठी १६ एप्रिलची सकाळ अत्यंत शुभ ठरली आहे. जागतिक बाजारपेठेतील मजबुती आणि भू-राजकीय तणाव कमी झाल्याच्या बातम्यांमुळे सेन्सेक्स आणि निफ्टीनं आज शानदार वाढीसह सत्राची सुरुवात केली. बीएसई सेन्सेक्स ५६५.१८ अंकांच्या (०.७२%) वाढीसह ७८,६७६.४२ च्या पातळीवर उघडला. तर, नॅशनल स्टॉक एक्सचेंजचा (NSE) निफ्टी १५६.२० अंकांनी (०.६४%) वधारून २४,३८७.५० च्या पातळीवर पोहोचला.
बाजारात चौफेर तेजीचे वातावरण
आजच्या सुरुवातीच्या व्यवहारात 'ॲडव्हान्स-डिक्लाईन' रेश्यो अतिशय मजबूत दिसले. सुमारे २,५३० शेअर्समध्ये तेजी दिसून आली, तर केवळ ४८७ शेअर्समध्ये घसरण झाली. तसंच १०८ शेअर्स त्यांच्या जुन्या पातळीवरच स्थिर राहिले. ही आकडेवारी बाजारात खरेदीचं वातावरण मोठ्या प्रमाणावर पसरल्याचे दर्शवते.
आयटी आणि मेटल सेक्टरमध्ये चमक
फार्मा सेक्टर वगळता आज सर्व क्षेत्रीय निर्देशांक ग्रीन झोनमध्ये म्हणजेच वाढीसह व्यवहार करत आहेत. आयटी, रियल्टी, मेटल आणि मीडिया सेक्टरमध्ये सर्वाधिक उत्साह असून हे सर्व १% च्या वाढीसह ट्रेड करत आहेत. निफ्टीवर वाढ नोंदवणाऱ्या प्रमुख शेअर्समध्ये इन्फोसिस, बजाज फायनान्स, टेक महिंद्रा आणि हिंदाल्को यांचा समावेश आहे. दुसरीकडे, ओएनजीसी, नेस्ले, सन फार्मा आणि अल्ट्राटेक सिमेंट यांसारख्या शेअर्समध्ये किरकोळ घसरण दिसून आली.
तिमाही निकालांमुळे 'या' कंपन्यांवर असेल लक्ष
आजचा दिवस कॉर्पोरेट जगतासाठीही महत्त्वाचा आहे, कारण अनेक दिग्गज कंपन्या आपल्या तिमाही निकालांची घोषणा करणार आहेत. यामध्ये विप्रो (Wipro), एचडीएफसी लाईफ इन्शुरन्स, एचडीएफसी एएमसी, एंजेल वन आणि क्रिसिल (CRISIL) यांचा समावेश आहे. याशिवाय, आलोक इंडस्ट्रीज आणि वारी रिन्यूएबल यांसारख्या कंपन्यांच्या आर्थिक कामगिरीवरही गुंतवणूकदारांची नजर असेल.
गुंतवणूकदारांसाठी महत्त्वाचे संकेत
तज्ज्ञांच्या मते, अमेरिका आणि इराणमधील शांतता कराराच्या आशेमुळे जागतिक स्तरावर कच्च्या तेलाच्या किमती आणि बाजारातील अस्थिरता कमी झाली आहे. मात्र, तिमाही निकालांमुळे वैयक्तिक शेअर्समध्ये चढ-उतार पाहायला मिळू शकतो.