Silver Price At Record High: 'रिच डॅड पुअर डॅड' या प्रसिद्ध पुस्तकाचे लेखक रॉबर्ट कियोसाकी हे सातत्याने आर्थिक विषयावर आधारित भाकीत करत असतात. २ वर्षांपूर्वी त्यांनी केलेले भाकीत आता खरं ठरताना दिसत आहे. एकीकडे सोन्याचे दर उच्चांकी पातळीवरुन घसरत आहेत, तर दुसरीकडे चांदी मात्र जोरदार वेगाने पळत आहे! चांदीने आपले जुने सर्व विक्रम मोडले असून, सतत नवीन उच्चांक गाठत आहे. सोमवारी (१० जून रोजी) शेवटच्या व्यवहारात, मल्टी कमोडिटी एक्सचेंज म्हणजेच MCX वर चांदीचा दर प्रति किलो १,०७,१७१ रुपये या विक्रमी पातळीवर पोहोचला.
MCX वर चांदीचा नवा विक्रम!
चांदीच्या किमतीत सातत्याने वाढ होत आहे. सोमवारी, ४ जुलैची एक्सपायरी डेट असलेली चांदी १,०५,१३६ रुपये प्रति किलोवरून थेट १,०७,१७१ रुपये प्रति किलो झाली. म्हणजे, फक्त एका दिवसात चांदीच्या किमतीत प्रति किलो २,०३५ रुपयांची वाढ झाली! मंगळवारी सुरुवातीला थोडी घसरण असली तरी, गेल्या एका महिन्यात चांदीने जोरदार मुसंडी मारली आहे. ९ मे रोजी प्रति किलो ९६,७२९ रुपये असलेली चांदी, जूनच्या सुरुवातीलाच १ लाख रुपयांच्या पुढे गेली आणि आता रोज नवे विक्रम नोंदवत आहे.
देशांतर्गत बाजारातही चांदीची 'चमक' कायम!
केवळ एमसीएक्स वरच नाही, तर देशांतर्गत सराफा बाजारातही चांदीची चमक वाढत आहे. इंडियन बुलियन ज्वेलर्स असोसिएशनच्या (IBJA.Com) वेबसाइटनुसार, सोमवारी १,०४,६१० रुपयांवर उघडल्यानंतर, संध्याकाळपर्यंत ती १,०५,२८५ रुपये प्रति किलोवर पोहोचली. ३ जून रोजी १,००,४६० रुपये प्रति किलो असलेली चांदी, ५ जून रोजी १,०४,६७५ रुपयांवर पोहोचली होती.
कियोसाकी यांचं भाकीत काय होतं?
'रिच डॅड पुअर डॅड'चे लेखक रॉबर्ट कियोसाकी हे त्यांच्या ट्विटर अकाउंटवर (आता X) सतत गुंतवणूक सल्ला देत असतात. त्यांच्या प्रत्येक सल्ल्यात सोने, चांदी आणि बिटकॉइनमध्ये गुंतवणूक करण्याचा उल्लेख असतो. सुमारे दोन वर्षांपूर्वी त्यांनी एका पोस्टमध्ये चांदीमध्ये गुंतवणूक करण्याचा सल्ला दिला होता आणि त्याला 'श्रीमंत होण्याचा मार्ग' म्हटले होते.
अलीकडेच, ६ जून रोजी त्यांनी आणखी एक पोस्ट केली होती, ज्यात त्यांनी अशी आशा व्यक्त केली होती की या वर्षाच्या अखेरीस चांदीच्या किमती दुप्पट होतील आणि प्रति औंस ७० डॉलरच्या पुढे जातील! सध्या आंतरराष्ट्रीय बाजारात चांदी प्रति औंस 36.48 डॉलरवर व्यवहार करत आहे. कियोसाकी यांनी लोकांना 'बनावट पैशां'चा वापर करून स्थानिक व्यापाऱ्यांकडून 'खरी चांदी' खरेदी करण्याचा सल्ला दिला आहे, कोणत्याही ईटीएफचा उल्लेख केला नाही.
वाचा - ५०० कर्मचाऱ्यांना फर्स्ट क्लास विमान तिकिट, खर्चासाठी ८.५ लाख अन्.. नक्की कोण आहे ही 'दिलदार' महिला?
आर्थिक संकटाची भीती?
कियोसाकी यांनी त्यांच्या पोस्टमध्ये चिंता व्यक्त केली होती की, स्टॉक, बाँड आणि रिअल इस्टेट मार्केटमधील घसरणीमुळे लाखो लोकांना, विशेषतः 'बेबी बूमर्स'ना मोठे आर्थिक नुकसान सहन करावे लागू शकते. त्यांच्या मते, जगात प्रत्येकाला श्रीमंत होण्याची संधी असतानाही, अनेक लोक गरीब होत आहेत.