तुमच्या खिशावर थेट परिणाम करणारे ५ नियम; आजपासून गॅस, प्रवास आणि पोस्ट ऑफिसमध्ये बदल

September Rule Change : १ सप्टेंबर २०२५ पासून नवीन आर्थिक महिन्याची सुरुवात झाली आहे. त्यामुळे आजपासून काही नियम बदलले आहेत. ज्याचा परिणाम थेट तुमच्या खात्यावर होऊ शकतो.

September Rule Change : सप्टेंबर २०२५ ची सुरुवात झाली असून, दर महिन्याप्रमाणेच हा महिनाही अनेक मोठे बदल घेऊन आला आहे. या बदलांचा थेट परिणाम सामान्य नागरिकांच्या आर्थिक जीवनावर होणार आहे. १ सप्टेंबरपासून लागू झालेल्या या बदलांमध्ये काही बातम्या दिलासा देणाऱ्या आहेत, तर काही चिंता वाढवणाऱ्या. तेल विपणन कंपन्यांनी व्यावसायिक गॅस सिलेंडरच्या किमती कमी केल्या आहेत, पण दुसरीकडे एसबीआय कार्डने काही व्यवहारांवरील रिवॉर्ड पॉइंट्स रद्द केले आहेत. चला, सप्टेंबरमधील अशाच पाच महत्त्वाच्या बदलांविषयी सविस्तर जाणून घेऊया.

एलपीजी सिलेंडर स्वस्त
सप्टेंबरच्या सुरुवातीची सर्वात चांगली बातमी म्हणजे एलपीजी सिलेंडरच्या किमतीत झालेली कपात. तेल विपणन कंपन्यांनी १९ किलोच्या व्यावसायिक गॅस सिलेंडरच्या किमतीत ५१.५० रुपयांची घट केली आहे. जुलै आणि ऑगस्ट महिन्यापाठोपाठ ही तिसरी कपात आहे.
नवीन दर:

• नवी दिल्ली: १,६३१.५० वरून १,५८० रुपये
• कोलकाता: १,७३४.५० वरून १,६८४ रुपये
• मुंबई: १,५८२.५० वरून १,५३१.५० रुपये
• चेन्नई: १,७८९ वरून १,७३८ रुपये
• मात्र, १४ किलोच्या घरगुती एलपीजी सिलेंडरच्या दरांमध्ये कोणताही बदल करण्यात आलेला नाही.

हवाई प्रवास होणार स्वस्त
गेल्या महिन्यात वाढलेल्या दरांनंतर १ सप्टेंबरपासून विमान इंधनाचे दर कमी झाले आहेत. इंधनाच्या किमतीत कपात झाल्यामुळे विमान कंपन्यांचा परिचालन खर्च कमी होईल, ज्यामुळे प्रवाशांसाठी हवाई प्रवास स्वस्त होऊ शकतो.
नवीन दर (प्रति किलोलीटर):

• दिल्ली: ९२,०२१.९३ वरून ९०,७१३.५२ रुपये
• कोलकाता: ९५,५१२.२६ वरून ९३,८८६.१८ रुपये
• मुंबई: ८४,८३२.८३ रुपये
• चेन्नई: ९४,१५१.९६ रुपये

एसबीआय क्रेडिट कार्डचे नियम बदलले
१ सप्टेंबरपासून लागू झालेला हा बदल क्रेडिट कार्डधारकांसाठी एक मोठा झटका आहे. एसबीआय कार्डने काही कार्ड्सवरील रिवॉर्ड पॉइंट्स रद्द केले आहेत. लाईफस्टाईल होम सेंटर एसबीआय कार्डच्या धारकांना आता ऑनलाइन गेमिंग आणि सरकारी पोर्टलवर केलेल्या व्यवहारांसाठी कोणतेही रिवॉर्ड पॉइंट मिळणार नाहीत.

भारतीय डाकच्या नियमांत बदल
भारतीय डाक विभागाने १ सप्टेंबर, २०२५ पासून एक महत्त्वाचा बदल लागू केला आहे. आता देशांतर्गत रजिस्टर्ड डाक (नोंदणीकृत पोस्ट) स्पीड पोस्ट सेवेमध्ये विलीन केली जात आहे. म्हणजेच, आता देशभरात कोणतीही रजिस्टर्ड डाक केवळ स्पीड पोस्टच्या माध्यमातूनच पाठवली जाईल.

सप्टेंबरमध्ये बँकेच्या सुट्ट्या
सप्टेंबर महिन्यात तुम्हाला बँकेत काही महत्त्वाचे काम असल्यास, आरबीआयची सुट्ट्यांची यादी पाहूनच घरातून बाहेर पडा. या महिन्यात जवळपास १५ दिवस विविध राज्यांमधील सण आणि उत्सवांमुळे बँका बंद राहतील. सुट्ट्यांची सविस्तर माहिती आरबीआयच्या अधिकृत वेबसाइटवर उपलब्ध आहे. मात्र, सुट्ट्यांच्या दिवशीही ऑनलाइन बँकिंग सेवा २४x७ सुरू राहतील.

वाचा - पैसे तयार ठेवा! टाटा कॅपिटलचा IPO लवकरच! शेअर बाजारात गुंतवणुकीची मोठी संधी; जाणून घ्या सर्व तपशील

या कामांसाठीही सप्टेंबर खास
सप्टेंबर महिन्यात काही महत्त्वपूर्ण कामांच्या अंतिम मुदतीही आहेत, ज्यांची नोंद घेणे आवश्यक आहे.
आयटीआर फाइलिंग: आयकर विभागाने आयटीआर भरण्याची अंतिम तारीख वाढवून १५ सप्टेंबर २०२५ केली आहे. त्यामुळे करदात्यांना या तारखेपूर्वी रिटर्न फाइल करणे आवश्यक आहे.
पेन्शन योजना: राष्ट्रीय पेन्शन प्रणाली अंतर्गत येणाऱ्या केंद्रीय कर्मचाऱ्यांसाठी युनिफाइड पेन्शन योजना निवडण्याची अंतिम तारीख ३० सप्टेंबर आहे.
स्पेशल एफडी: इंडियन बँक आणि आयडीबीआय बँकेच्या काही विशेष एफडी योजनांमध्ये गुंतवणूक करण्याची अंतिम तारीख ३० सप्टेंबर आहे.