FASTag Use : देशभरात FASTag चा वापर आणखी सोपा आणि अधिक फायदेशीर बनवण्यासाठी केंद्र सरकार एक महत्त्वाचे पाऊल उचलत आहे. आतापर्यंत आपण FASTag चा वापर फक्त टोल भरण्यासाठी करत होतो, पण आता लवकरच तुमचा हाच टॅग अनेक कामांसाठी वापरला जाईल. रस्ते वाहतूक आणि महामार्ग मंत्रालयाने FASTag चा वापर इलेक्ट्रिक वाहनांचे चार्जिंग, पार्किंग शुल्क आणि वाहन विमा यांसारख्या सेवांसाठीही करण्याचं ठरवलं आहे.
एकाच टॅगमध्ये अनेक फायदे
या नव्या बदलामुळे सामान्य लोकांना खूप फायदा होणार आहे. एकाच टॅगमुळे अनेक ठिकाणी पेमेंट करण्याची सोय मिळेल आणि रोख रक्कम वापरण्याची गरज कमी होईल. यामुळे डिजिटल व्यवहारांमध्ये अधिक पारदर्शकता येईल. या उद्दिष्टासाठी, इंडियन हायवेज मॅनेजमेंट कंपनी लिमिटेड (IHMCL) ने अनेक फिनटेक कंपन्यांसोबत (डिजिटल पेमेंट कंपन्या) बैठक घेतली आहे.
या बैठकीत FASTag चा विविध कामांसाठी वापर कसा करता येईल, त्यासाठीचे नियम, ग्राहकांच्या तक्रारी कशा हाताळायच्या आणि डेटाची सुरक्षा कशी ठेवायची यावर चर्चा झाली. मंत्रालयाने सांगितले आहे की, टोल व्यतिरिक्त इतर सेवांसाठी FASTag वापरल्यास या तंत्रज्ञानाचा आणखी विस्तार होईल आणि लोकांना अधिक सुविधा मिळतील.
मल्टी-लेन फ्री फ्लो टोलिंग सिस्टम म्हणजे काय?
या बैठकीत मल्टी-लेन फ्री फ्लो (MLFF) टोलिंग सिस्टम वरही भर देण्यात आला. या नवीन तंत्रज्ञानामुळे टोल नाक्यावर थांबण्याची गरजच नाही. तुम्ही गाडी थांबवल्याशिवाय टोल प्लाझामधून थेट जाऊ शकता. RFID रीडर आणि ANPR कॅमेरे तुमच्या गाडीला ओळखतील आणि तुमच्या FASTag मधून आपोआप पैसे कापले जातील. यामुळे वेळेची आणि इंधनाची बचत होईल.
FASTag ची सध्याची स्थिती
सध्या, NETC FASTag प्रणाली देशभरातील १७२८ टोल प्लाझावर सक्रिय आहे. यामध्ये १११३ राष्ट्रीय महामार्ग आणि ६१५ राज्य महामार्गांचा समावेश आहे. एकूण टोल पेमेंटपैकी जवळपास ९८.५% पेमेंट FASTag द्वारे केले जाते. आतापर्यंत ११.०४ कोटींहून अधिक FASTag जारी करण्यात आले आहेत आणि ते ३८ पेक्षा जास्त बँकांमध्ये उपलब्ध आहेत.
वाचा - लढाई संपली, आता कमाईची संधी! सेन्सेक्स ४०० अंकांनी वधारला, 'या' शेअर्समध्ये सर्वाधिक वाढ
केंद्रीय मंत्री नितीन गडकरी यांनी म्हटले आहे की, FASTag मध्ये खूप क्षमता आहे. त्यांना हे केवळ टोल भरण्याचे साधन नाही, तर देशभरात अखंड आणि स्मार्ट प्रवासाचे एक 'सुपर प्लॅटफॉर्म' बनवायचे आहे. सरकारचा हा प्रयत्न वाहतूक क्षेत्रात एक मोठी डिजिटल क्रांती घडवून आणेल.