कर्मचारीभविष्य निर्वाह निधी संघटना, म्हणजेच EPFO ने एक नवीन विक्रम प्रस्थापित केला आहे. जून २०२५ मध्ये EPFO ने २१.८९ लाख नवीन सदस्य जोडले. म्हणजेच, सुमारे २२ लाख लोकांना औपचारिक नोकऱ्या मिळाल्या. एप्रिल २०१८ मध्ये पेरोल डेटा ट्रॅकिंग सुरू झाल्यापासून हा सर्वाधिक आकडा आहे. मे २०२५ ते जून २०२५ पर्यंत ९.१४ टक्के वाढ झाली, तर जून २०२४ च्या तुलनेत जून २०२५ मध्ये नोकऱ्यांमध्ये १३.४६ टक्के वाढ झाली आहे.
जून २०२५ मध्ये EPFO ने सुमारे १०.६२ लाख नवीन लोक जोडले, जे मे २०२५ पेक्षा १२.६८% आणि जून २०२४ पेक्षा ३.६१% जास्त आहे. यापैकी बहुतांश, म्हणजेच ६.३९ लाख लोक १८-२५ वयोगटातील तरुण आहेत, जे एकूण नवीन लोकांच्या ६०% पेक्षा जास्त आहे. या वयोगटातील वाढ ९.७२ लाखांवर पोहोचली, जी मे २०२५ पासून ११.४१% आणि जून २०२४ पासून १२.१५% वाढ दर्शवते. या ट्रेंडवरुन असे दिसून येते की, बहुतांश नवीन लोक तरुण आणि पहिल्यांदाच नोकरी करणारे आहेत.
अनेकजण EPFO मध्ये पुन्हा सामील होत आहेत
डेटा दर्शवितो की, अनेकजण पुन्हा ईपीएफओमध्ये त्यांची खाती उघडत आहेत. जून २०२५ मध्ये पूर्वी ईपीएफओ सोडलेले सुमारे १६.९३ लाख लोक पुन्हा सामील झाले. तर, मे २०२५ ते जून या कालावधीत ही वाढ ५.०९% आहे. या लोकांनी त्यांच्या जुन्या ठेवी काढण्याऐवजी त्या इतर खात्यांमध्ये हस्तांतरित केल्या. याचा अर्थ असा की, नोकरी सोडताना पीएफमधून संपूर्ण रक्कम काढण्याऐवजी लोकांनी नवीन खात्यात पैसे हस्तांतरित करणे पसंत केले.
महिलाही मागे नाहीत
ईपीएफओच्या अलीकडील अहवालातून हे स्पष्ट होते की, भारतातील कर्मचाऱ्यांमध्ये महिलांची संख्याही वाढत आहे. केवळ जून महिन्यातच ३.०२ लाख महिला ईपीएफओमध्ये सामील झाल्या, जे मे महिन्यापेक्षा १४.९२ टक्के जास्त आहे. आपण वार्षिक आकडेवारीबद्दल बोललो, तर त्यातही बरीच वाढ झाली आहे. जून २०२५ च्या तुलनेत यावर्षी महिलांची संख्या १०.२९ टक्क्यांनी वाढली आहे.
कोणत्या राज्यात किती नोकऱ्या?
देशातील नवीन नोकऱ्यांबद्दल बोलायचे झाले तर, एकूण नोकऱ्यांपैकी ६१.५१% नोकऱ्या महाराष्ट्र, कर्नाटक, तामिळनाडू, गुजरात आणि हरियाणा या फक्त पाच राज्यांमधून आल्या आहेत. बहुतांश लोकांना महाराष्ट्रात नोकऱ्या मिळाल्या आहेत. २०.०३% नोकऱ्या फक्त याच राज्यातील आहेत. क्षेत्राबद्दल बोलायचे झाले तर, सर्वाधिक नोकऱ्या मनुष्यबळ पुरवठा, सुरक्षा सेवा, शाळा-महाविद्यालय, इमारत-बांधकाम आणि अभियांत्रिकी उत्पादने यासारख्या क्षेत्रात निर्माण झाल्या आहेत.