Punjab National Bank FD Calculator: सार्वजनिक क्षेत्रातील पंजाब नॅशनल बँक (PNB) आपल्या मुदत ठेव (FD) खात्यांवर जबरदस्त व्याज देत आहे. ही सरकारी बँक ग्राहकांना वेगवेगळ्या कालावधीच्या एफडी योजनांवर ३.०० टक्के ते ७.४० टक्क्यांपर्यंत व्याज देत आहे. पीएनबीमध्ये तुम्ही किमान ७ दिवसांपासून ते कमाल १० वर्षांच्या कालावधीसाठी एफडी खातं उघडू शकता.
स्पेशल एफडी योजना आणि व्याजाचे दर
पंजाब नॅशनल बँक ४४४ दिवसांच्या स्पेशल एफडी योजनेवर सर्वाधिक व्याज देत आहे. या योजनेअंतर्गत सामान्य नागरिकांना ६.६० टक्के, ज्येष्ठ नागरिकांना ७.१० टक्के आणि ८० वर्षांवरील अति-ज्येष्ठ नागरिकांना ७.४० टक्के व्याज मिळत आहे. तसंच, ३०४ दिवस ते १ वर्षापर्यंतच्या एफडीवर सामान्य नागरिकांना ५.६० टक्के, ज्येष्ठ नागरिकांना ६.१० टक्के आणि अति-ज्येष्ठ नागरिकांना ६.४० टक्के व्याज दिलं जात आहे.
₹३,००,००० जमा केल्यास किती फायदा?
जर तुम्ही पीएनबीमध्ये ३०४ दिवसांच्या एफडी योजनेत ३ लाख रुपये जमा केले, तर सामान्य नागरिकांना १४,२२२ रुपयांच्या व्याजासह एकूण ३,१४,२२२ रुपये मिळतील. याच कालावधीसाठी ज्येष्ठ नागरिकांना १५,५१४ रुपयांच्या व्याजासह एकूण ३,१५,५१४ रुपये मिळतील, तर अति-ज्येष्ठ नागरिकांना १६,२९२ रुपयांच्या खात्रीशीर व्याजासह एकूण ३,१६,२९२ रुपये परत मिळतील. एफडी हा गुंतवणुकीचा सर्वात सुरक्षित पर्याय मानला जातो, कारण यामध्ये एका निश्चित काळानंतर तुम्हाला ठरलेलं व्याज आणि संपूर्ण रक्कम परत मिळते.