वयाच्या तिशीत ‘हे’ ५ आर्थिक नियम शिका! तुम्हाला श्रीमंत होण्यापासून कोणीही रोखू शकणार नाही

Financial Planning : २० ते ३० वयोगटातील काळ हा प्रत्येकाच्या आयुष्यातील सर्वात महत्त्वाचा असतो. हे असे वय आहे जेव्हा बहुतेक लोक त्यांचे करिअर सुरू करतात.

Financial Planning : आजच्या अर्थयुगात प्रत्येकाला चांगली कमाई करायची आहे, आणि अनेक जण करतही आहेत. परंतु, योग्य आर्थिक धोरण आणि समजूतदारपणा नसल्यामुळे अनेक तरुण कमी वयातच कर्जाच्या जाळ्यात अडकत आहेत. ३० वर्षे हा आयुष्याचा असा टप्पा आहे, जिथून खऱ्या अर्थाने पैसा बनवण्याचा खेळ सुरू होतो. तुम्ही नोकरी करत असाल किंवा तुमचा व्यवसाय करत असाल, तर ३० वर्षांचे होण्यापूर्वी प्रत्येक तरुणाने स्वीकारायलाच हवेत, असे ५ महत्त्वाचे आर्थिक नियम.

१. कमाई आणि कर्जाची अचूक माहिती ठेवा
फक्त पैसे वाचवणे पुरेसे नाही; तुमच्याकडे एकूण किती पैसा आहे आणि तो कुठे गुंतवलेला आहे, याची माहिती ठेवा. सर्वात महत्त्वाचे म्हणजे, तुम्ही जर कर्ज घेतले असेल, तर ते किती आहे आणि त्यावर तुम्हाला कितके व्याज द्यावे लागते, याची नोंद ठेवा. तुमचा पैसा जर कुठे निष्क्रिय पडून असेल आणि त्यावर कोणताही परतावा मिळत नसेल, तर तो लगेच अशा ठिकाणी गुंतवा जिथे चांगला परतावा मिळेल. जर तुम्ही जास्त व्याजदराचे कर्ज घेतले असेल, तर ते स्वस्त कर्जासह बदलण्याचा प्रयत्न करा. थोडीशी हुशारी तुम्हाला भविष्यात आर्थिक तणावापासून दूर ठेवेल.

२. दर महिन्याचे बजेट तयार करा
तुमचा पगार कमी असो वा जास्त, प्रत्येक महिन्याचे बजेट तयार करणे आवश्यक आहे. तुमचे बजेट असे असावे की, तुम्ही तुमच्या पगारातून काही रक्कम तरी नक्कीच वाचवू शकाल. यासाठी बाहेरचे अनावश्यक खाणे, अनावश्यक शॉपिंग, सतत बाहेर फिरायला जाणे यांसारख्या अनावश्यक खर्चांवर नियंत्रण ठेवा आणि फक्त गरजेच्या वस्तूंवर पैसा खर्च करा.

३. नियमित गुंतवणुकीला सुरुवात करा
तुमची मासिक बचत केवळ बचत खात्यात न ठेवता, ती गुंतवणूक करणे सुरू करा. गुंतवणूक करून तुम्ही तुमचे भविष्य आर्थिकदृष्ट्या सुरक्षित करू शकता. यासाठी तुम्ही दर महिन्याला एसआयपी सुरू करू शकता आणि दीर्घकाळात चांगला परतावा मिळवू शकता. 'आज थोडं, उद्या मोठं' हे सूत्र लक्षात ठेवा.

४. हेल्थ आणि लाईफ इन्शुरन्स (विमा) घ्या
तुम्हाला किंवा तुमच्या कुटुंबातील कोणाला गंभीर आजार झाल्यास, एका चांगल्या रुग्णालयातील उपचार तुमचा सगळा जमा केलेला पैसा एका झटक्यात संपवू शकतो. म्हणून, ३० वर्षांचे होईपर्यंत तुम्ही तुमच्या संपूर्ण कुटुंबासाठी हेल्थ इन्शुरन्स (आरोग्य विमा) घेणे अनिवार्य आहे. यासोबतच, जर दुर्दैवाने तुम्हाला काही झाले, तर तुमचे कुटुंब आर्थिकदृष्ट्या कोणावर अवलंबून राहील? यासाठी तुमच्या उत्पन्नानुसार पुरेशा रकमेचा लाईफ इन्शुरन्स (मुदत विमा) घेणे आवश्यक आहे.

वाचा - SBI ची नोकरी सोडून सुरू केली शेती, आज ७ कोटींच्या हेलिकॉप्टरचा मालक! ५ एकरापासून सुरुवात

५. कमाई वाढवण्यासाठी कौशल्यांवर लक्ष केंद्रित करा
आजच्या स्पर्धात्मक युगात तुम्ही जर दरवर्षी किमान एक नवीन कौशल्य किंवा नवीन कोर्स शिकलात, तर तुमची पगारवाढ होण्याची आणि नोकरीत प्रगती होण्याची शक्यता वाढते. तुम्ही फ्रीलान्सिंग करून किंवा पार्ट-टाईम काम करून उत्पन्नाचा दुसरा स्त्रोत निर्माण करू शकता. यामुळे तुमची कमाई आणि बचत दोन्ही वाढेल. यासाठी दर आठवड्याला थोडा वेळ शिकण्यासाठी द्या.