Train Ticket :रेल्वेने प्रवास करताना 'सीट कन्फर्म होणार की नाही?' ही चिंता आता लवकरच दूर होणार आहे! भारतीय रेल्वे आपल्या प्रवाशांसाठी एक अत्यंत महत्त्वाचा बदल करत आहे. लवकरच, प्रवाशांना त्यांच्या सीट कन्फर्मेशनची माहिती ट्रेन सुटण्यापूर्वी २४ तास आधीच मिळेल. सध्या ही माहिती प्रवाशांना फक्त ४ तास आधी मिळते, ज्यामुळे वेटिंग तिकिटावर प्रवास करणाऱ्यांना अनेकदा मनस्ताप होतो.
'टाईम्स ऑफ इंडिया'मधील वृत्तानुसार, रेल्वे एका नवीन प्रणालीवर काम करत आहे, ज्यामुळे प्रवासाच्या २४ तास आधीच कन्फर्म केलेल्या जागांसह चार्ट जाहीर केले जातील. ज्या प्रवाशांना लांबून ट्रेन पकडण्यासाठी यावं लागतं, त्यांच्यासाठी हा बदल खूप मोठा दिलासा ठरणार आहे.
पायलट प्रोजेक्ट सुरू
रेल्वेच्या एका वरिष्ठ अधिकाऱ्याने दिलेल्या माहितीनुसार, राजस्थानच्या बिकानेर विभागात ६ जूनपासून या नव्या प्रणालीचा एक पायलट प्रोजेक्ट सुरू करण्यात आला आहे. महत्त्वाचे म्हणजे, हा प्रयोग यशस्वीपणे सुरू आहे आणि अद्याप कोणतीही अडचण आलेली नाही. रेल्वे काही आठवडे हा पायलट प्रकल्प सुरू ठेवणार आहे, जेणेकरून भविष्यात येणाऱ्या कोणत्याही समस्या ओळखता येतील आणि त्यावर तोडगा काढता येईल. उदाहरणार्थ, १०० किमी किंवा त्याहून अधिक अंतरावरून येणाऱ्या प्रवाशांना २४ तास आधी माहिती मिळाल्यास, त्यांना वेळेत आणि कोणत्याही त्रासाशिवाय रेल्वे स्थानकावर पोहोचणे सोपे होईल.
२४ तास आधी चार्ट जारी करणे शक्य
एका दुसऱ्या अधिकाऱ्याने सांगितले की, तत्काळ तिकिटे ट्रेन सुटण्याच्या ४८ तास आधी बुक केली जातात, त्यामुळे एक दिवस आधी संपूर्ण चार्ट जारी करण्यात कोणतीही तांत्रिक अडचण नाही.
सध्या तरी, रेल्वे कन्फर्म बुकिंग असलेल्या प्रवाशांची दुसरी आणि तिसरी यादी जाहीर करेल की नाही, हे स्पष्ट नाही. कारण, अनेकदा कन्फर्म तिकीट असलेले प्रवासी शेवटच्या २४ तासांत त्यांचे बुकिंग रद्द करतात. परंतु, रेल्वे सूत्रांनी सांगितले की, पायलट प्रकल्प पूर्ण झाल्यानंतर आणि प्रवाशांच्या हिताचा विचार करून यावर निर्णय घेतला जाईल.
वाचा - बँकांमध्ये ७८,२१३ कोटी रुपये बेवारस पडून! सरकार प्रत्येक जिल्ह्यात वाटणार पैसे, काय आहे योजना?
याआधी, रेल्वे आरक्षण चार्ट सहसा दोनदा तयार करत असे – पहिला चार्ट ट्रेन सुटण्याच्या चार तास आधी, आणि दुसरा किंवा शेवटचा चार्ट ट्रेन सुटण्याच्या ३० मिनिटे आधी तयार केला जात असे. आताच्या या बदलामुळे रेल्वे प्रवासाचे नियोजन करणे अधिक सोपे आणि सोयीचे होणार आहे.