आहारात मुळा असावा. मुळ्यात पचन सुधारण्यासाठी मदत करणारे फायबर, शरीराला ताजेतवाने ठेवणारे जीवनसत्त्व सी, तसेच हाडांच्या आरोग्यासाठी आवश्यक कॅल्शियम आणि मॅग्नेशियम असतात. (Perfect recipe to improve digestion - Radish parathas for breakfast, a delicious way to keep your stomach clean)याशिवाय त्यात पोटॅशियम असल्यामुळे रक्तदाब संतुलित राहतो. मुळ्यात फोलेट, जीवनसत्त्व बी६, फॉस्फरस, अँटी ऑक्सिडंट्स आणि भरपूर पाणीही असते, ज्यामुळे शरीर हायड्रेट राहते आणि विषारी पदार्थ बाहेर पडण्यास मदत होते. मुळा असाच खायला कोणाला आवडत नाही. त्यामुळे मुळ्याचे असे पराठे करा. चवीला एकदम मस्त असतात. नक्कीच आवडतील.
साहित्य
मुळा, तेल, हिरवी मिरची, लाल तिखट, पाणी, गव्हाचे पीठ, मीठ, लाल तिखट, हळद, कोथिंबीर, धणे- जिरे पूड
कृती
१. आधी पीठ मळून घ्यायचे. म्हणजे ते थोडावेळ सेट करत ठेवता येते. गव्हाचे पीठ घ्यायचे. कोमट पाण्यात मळायचे. पोळ्यांसाठी जसे पीठ मळता तसेच मध्यम घट्ट पीठ मळायचे. हिरव्या मिरचीचे बारीक तुकडे करायचे. कोथिंबीरीची ताजी जुडी घ्यायची. निवडायची आणि बारीक चिरायची.
२. मुळा सोलायचा. टोकं चिरायची. नंतर मुळा मस्त किसून घ्यायचा. एका खोलगट पातेल्यात घ्यायचा. त्यात चमचाभर मीठ घालायचे आणि मुळा हाताने फिरवत राहायचा. त्याला पाणी सुटले की मुळ्याचे पाणी काढून घ्यायचे. अगदीच चोथा करु नका मात्र सुका करा. सुका नसेल तर पराठा लाटला जाणार नाही.
३. मुळा सुका केल्यावर त्यात चवी पुरते मीठ घाला. चमचाभर लाल तिखट घाला. तसेच चमचाभर हळदही घाला. बारीक चिरलेली कोथिंबीर घालायची. हिरव्या मिरचीचे तुकडे घालायचे. चमचाभर लाल तिखट घालायची. चमचाभर धणे-जिरे पूड घालायची. सारण छान मळून घ्यायचे.
४. पिठाच्या लाट्या तयार करायच्या. मध्यम आकाराच्या लाट्या करा. त्यात सारण भरायचे. लाटी व्यवस्थित बंद करायची. त्याला पीठ लावायचे आणि लाटायला घ्यायची. जरा मध्यम जाड लाटायची. तवा गरम करायचा आणि त्यावर थोडे तेल घालायचे. तेलावर पराठा लावायचा. पराठा दोन्ही बाजूनी छान परतून घ्यायचा. गरमागरम पराठा चटणी सॉस किंवा एखाद्या भाजीशी खा.