आजकाल बाजारात सहज मिळणारा चाट मसाला जवळजवळ प्रत्येक घरात वापरला जातो. फळांवर, सॅलडवर किंवा विविध पदार्थांवर भुरभुरवला की चव लगेच वाढते. पण हा तयार मसाला वापरताना आपण त्याच्या गुणवत्तेकडे फारसं लक्ष देत नाही. (Make chaat masala at home, very easy recipe, don't buy from outside )अशा वेळी घरी केलेला चाट मसाला हा अधिक चविष्ट, सुरक्षित आणि विशेषतः पचनासाठी फायदेशीर ठरतो.
घरी तयार केलेल्या चाट मसाल्यात वापरले जाणारे घटक साधारणपणे जिरे, धणे, काळं मीठ, सैंधव मीठ, आमचूर, सुंठ, मिरी यांसारखे नैसर्गिक आणि पचनास मदत करणारे असतात. हे सगळे पदार्थ आपल्या पारंपरिक आहारात पाचक म्हणून ओळखले जातात. त्यामुळे हा मसाला केवळ चव वाढवत नाही तर अन्न पचवण्यासही मदत करतो. गॅस, अपचन यासारख्या समस्या कमी होण्यास मदत होते. चाट मसाला घरी करणं फारच सोपं आहे. रेसिपी जाणून घ्या.
साहित्य
धणे, जिरे, काळीमिरी, ओवा, बडीशेप, पुदिना, आमचूर पावडर, साखर, हिंग, लाल तिखट, काळं मीठ, लवंग
कृती
१. एका पॅनमध्ये अर्धी वाटीभर धणे घ्यायचे. तसेच अर्धी वाटी जिरे घ्यायचे. दोन्ही पदार्थ मस्त भाजून घ्यायचे. त्यातच पुदिन्याची काही स्वच्छ ताजी पाने भाजून घ्यायची. पूर्ण कुरकुरीत होईपर्यंत भाजायची. नंतर चार ते पाच चमचे ओवा घ्यायचा. त्यापेक्षा थोडी जास्त बडीशेप घ्यायची. चार लवंग घ्यायच्या तसेच थोडी काळीमिरी घ्यायची, मसाला मस्त खमंग भाजून घ्यायचा.
२. सगळे पदार्थ भाजून गार झाले की मिक्सरच्या भांड्यात घ्यायचे. त्यात अगदी चमचाभर साखर घालायची. थोडे हिंग घालायचे. दोन ते चार चमचे आमचूर पावडर घालायची. चमचाभर लाल तिखट घालायचे. थोडं काळं मीठ घालायचं. सगळे पदार्थ एकत्र केल्यावर मिक्सरमधून वाटून घ्यायचे. त्याची छान पूड तयार होते. बंद डब्यात साठवून ठेवा.