चहा गुळाचा असो किंवा साखरेचा वेळेला चहा असणं आवश्यकच... सध्या अशा कडाक्याच्या थंडीत आणि आरोग्यासाठी फायदेशीर म्हणून आपल्यापैकी बरेचजण गुळाचा चहा पिणे पसंत करतात. थंडीच्या दिवसांत गरमागरम गुळाचा चहा पिण्याचा आनंदच काही वेगळा असतो. गोडसर, उबदार आणि आरोग्याला फायदेशीर असा हा चहा हिवाळ्यात शरीराला ऊर्जा देतो, पचन सुधारतो आणि सर्दी-खोकल्यापासूनही बचाव करतो(how to make gud tea without curdling).
साखरेऐवजी गुळाचा वापर केल्याने हा चहा केवळ चविष्ट बनत नाही, तर तो आरोग्याच्या दृष्टीने देखील अधिक फायदेशीर ठरतो. गुळाचा इवलासा खडा शरीराला उब देतो, रोगप्रतिकारशक्ती वाढवतो आणि पचनासाठी मदत करतो. परंतु, गुळाचा चहा तयार करताना अनेक गृहिणींची एकच मोठी तक्रार असते, ती म्हणजे, चहामध्ये गूळ घातला की तो फाटतो...अशावेळी चहाचा पूर्ण मूड खराब होतो आणि मेहनतही वाया जाते. पण काळजी करू नका… काही सोप्या आणि घरातच करता येणाऱ्या टिप्स वापरल्या तर गुळाचा चहा (jaggery tea without splitting milk) कधीच फाटणार नाही. गुळाचा चहा तयार करण्याची अचूक पद्धत आणि काही सोप्या टिप्स, ज्यामुळे तुमचा चहा नेहमी मस्त आणि न फाटता एकदम छान, घट्ट व दाटसर होईल.
चहामध्ये गूळ घातल्यावर तो फाटू नये म्हणून काय करावं ?
१. पाणी आणि गुळाचे योग्य प्रमाण :- गुळाचा चहा फाटू नये म्हणून सर्वातआधी पाणी आणि गुळाचे मिश्रण योग्य प्रमाणात शिजवणे गरजेचे असते. ३ कप चहासाठी, पॅनमध्ये दीड कप ( १.५ कप ) पाणी टाकून गरम होऊ द्या. जर तुम्हाला कमी दुधाचा चहा आवडत असेल, तर तुम्ही २ कप पाणी देखील घेऊ शकता. पाण्याला उकळी आल्यावर त्यात चहापत्ती आणि गूळ घाला. साखरेच्या तुलनेत गुळाचे प्रमाण जास्त ठेवावे लागते, कारण गूळ साखरेइतका गोड नसतो. गूळ पाण्यामध्ये चांगला विरघळू द्या आणि त्याचा रंग पूर्णपणे उतरू द्या.
हिरव्या मुगाचे लाडू म्हणजे लहानपणची सुंदर आठवण, आजीच्या काळातलं सुपरफूड-पाहा पारंपरिक रेसिपी...
२. हिवाळ्यासाठी चहात घाला हे पदार्थ :- गुळाच्या चहाला अधिक आरोग्यदायी आणि चविष्ट करण्यासाठी त्यात ताजे मसाले घालावेत. खलबत्त्यात वेलची, लवंग आणि काळीमिरी आधी कुटून घ्या. आता याच मसाल्यात आल्याचा छोटा तुकडा आणि तुळशीची पाने घाला. लक्षात ठेवा की, आलं आणि तुळशीमध्ये ओलावा असतो, म्हणून त्यांना सुख्या मसाल्यांनंतर कुटल्यास मसाला अधिक चांगला तयार होतो. कुटलेले मसाले चहामध्ये घालून मिश्रण काही वेळ मंद आचेवर उकळू द्या.
३. दूध वेगळे गरम करणे :- चहाला फाटण्यापासून वाचवणारे सर्वात महत्त्वाचे काम हेच आहे. चहा फाटण्याचे कारण तापमानातील फरक हेच असते. ज्या वेळी एका गॅसवर चहाचे मिश्रण उकळत असेल, त्याचवेळी दुसऱ्या गॅसवर दूध गरम करण्यासाठी ठेवा. दूध फक्त गरम करायचे नाही, तर त्याला उकळी येईपर्यंत चांगले गरम करायचे आहे. जेव्हा गरम गुळाचे मिश्रण थंड किंवा कोमट दुधाच्या संपर्कात येते, तेव्हा गुळाचे आम्लीय गुणधर्मामुळे दूध फाटते. परंतु, उकळते दूध टाकल्यास चहा फाटत नाही.
४. गरम दूध टाकणे आणि सतत उकळणे :- जेव्हा दूध चांगले उकळेल, तेव्हा ते थेट उकळत असलेल्या चहाच्या मिश्रणात टाका. गरम दूध टाकल्यास गुळाचा चहा कधीही फाटत नाही. दूध टाकल्यानंतर, चहाला गॅसवर सतत हलवत ठेवा. जर गरम दूध चहात घातले, तर कितीही वेळ चहा गरम केला तरी चहा फाटणार नाही. तुम्हाला फक्त एकच चूक करण्यापासून वाचायचे आहे थंड दूध चहात अजिबात घालू नका.
५. ३ मिनिटे उकळणे आणि गाळून सर्व्ह करणे :- दूध घातल्यानंतर चहाला अंदाजे ३ मिनिटांपर्यंत चांगल्या प्रकारे उकळू द्या. यामुळे गूळ, दूध आणि मसाल्यांची चव एकमेकांमध्ये चांगली मिसळून जाते. उकळल्यानंतर, गॅस बंद करा आणि चहाला लगेच कपात गाळून घ्या. अशा प्रकारे, तुमचा परफेक्ट गुळाचा चहा न फाटता अगदी लगेच तयार होईल.