वादळी पावसाचा तडाखा

धाटाव : आॅक्टोबर हिटमुळे तापमानात वाढ झाल्याने घामाच्या धारा वाहत असताना विजयादशमीच्या दिवशी रात्री अचानक सोसाट्याच्या वादळीवाऱ्यासह पावसाने हजेरी लावली आणि क्षणार्धात होत्याचे नव्हते झाले. अवघ्या १० मिनिटांसाठी आलेल्या या वादळी वाऱ्याचा धाटावला चांगलाच तडाखा बसला. अनेकांच्या घरांची छपरे, कौले, सिमेंटचे पत्रे उडाले, जिवंत विद्युत वाहिन्यांचे खांब वाकले, तर काही ठिकाणी झाडे उन्मळून पडल्याने वाहतूक ठप्प झाली.विजयादशमीच्या दिवशी गावोगावी सीमोल्लंघन सुरू असताना अचानक आलेल्या परतीच्या पावसाने नागरिकांची त्रेधातिरपीट केली. १० मिनिटे सुरू असलेल्या वादळी वाऱ्यासह पावसामुळे धाटाव, बारसोली, विष्णुनगर, किल्ला, मळखंडवाडी, वाशी, लांढर, तळाघर बोरघर, रोठ बुद्रुक, उडदवणे, वरसे या गावांतील ठिकठिकाणी घरांची छपरे, कौले, सिमेंट पत्रे उडाल्यामुळे लाखो रूपयांचे नुकसान झाले, तर जिवंत विद्युत वाहिन्यांचे खांब वाकल्यामुळे वीज खंडित झाली. त्यामुळे धाटाव परिसर रात्रभर अंधारात होता. धाटाव नाक्यावरील भक्तिसागर सोसायटी, वाशी, लांढरकडे जाणाऱ्या रस्त्यावर झाडे उन्मळून पडल्याने वाहतूक काही वेळ ठप्प झाली होती तर, मळखंडवाडी येथील गायकवाड यांच्या घरानजीक असलेले झाड कारवर पडून कारचे मोठ्या प्रमाणात नुकसान झाले. संपूर्ण धाटाव परिसराला वादळी पावसाने चांगलेच झोडपून काढल्याने नाक्यावरील लहान-मोठ्या दुकानदारांसह औद्योगिक वसाहतीतील काही कारखान्यांना याचा चांगलाच फटका बसला, तर काही दिवसांवर कापणीला आलेली भातपिके भुईसपाट झाल्यामुळे शेतकरी चिंतेत सापडला आहे. शेतकरी राजाच्या तोंडचे पाणी पळाल्याचे चित्र आहे. वादळी वाऱ्याबरोबर घरावर आलेले अस्मानी संकट आणि त्यातच भातशेतीचे नुकसान यामुळे शेतकरी चिंताग्रस्त झाला आहे. पावसामुळे घरावरील छप्पर उडून घरात पाणी साचल्यामुळे गृहोपयोगी वस्तूंसोबतच टीव्ही, फ्रीज, वॉशिंग मशिन, पंखे यांसह इतर वस्तूंचे नुकसान झाले आहे. सुदैवाने कोणतीही जीवितहानी झालेली नाही, मात्र धाटाववासीयांना लाखो रूपयांच्या वित्तहानीला सामोरे जावे लागले आहे. रात्री अचानक आलेल्या वादळी वाऱ्यामुळे धाटावमधील अनेक घरांचे नुकसान झाल्याचे समजताक्षणी धाटावचे सरपंच विनोद पाशिलकर, उपसरपंच सुदाम रटाटे, नयन रटाटे, संजय भोकटे, चंद्रकांत भोकटे, धर्मराज माने, चंद्रकांत शिंदे, मनोहर बामुगडे यांनी नुकसान झालेल्या घरांची ताबडतोब पाहणी केली, तर या दुर्घटनेत किरकोळ दुखापत झालेल्या महिलांना उपचाराकरिता रूग्णालयात हलविण्यात आले.रोह्याच्या तहसीलदार ऊर्मिला पाटील यांनी धाटावमधील नुकसानग्रस्तांच्या घरांची पाहणी केली. यावेळी धाटावचे माजी सरपंच विजयराव मोरे, सरपंच पाशिलकर, मंडळ अधिकारी तांडेल, तलाठी एम.पी.मळेकर, रवींद्र बाईत, चंद्रकांत राऊत, प्रतिभा बैकर, प्रवीण भोईर, ग्रामविकास अधिकारी दीपक चिपळूणकर, यदुराम रटाटे, तुकाराम रटाटे, केशव भोकटे, संजय म्हसकर यांसह ग्रामस्थ व तरूणवर्ग उपस्थित होते.आम्ही आमच्या टीममार्फत पंचनामे करून वरिष्ठ पातळीवर पंचनामे पाठवून ठेवू, असे तहसीलदार ऊर्मिला पाटील यांनी सांगितले. दरम्यान, अचानक झालेल्या या घटनेबाबत परिसरातील अंदाजे ४०० ते ५०० जणांचे नुकसान झाल्याचे समजते, मात्र झालेल्या नुकसानीबाबत आम्हाला नुकसानभरपाई मिळावी, अशी ग्रामस्थांची मागणी आहे. तर मागील वर्षी शेतीच्या नुकसानीबाबत अद्याप भरपाई मिळाली नसल्याची नाराजी व्यक्त करीत या घटनेबाबतच्या नुकसानभरपाईची प्रतीक्षा करावी लागणार, असे ग्रामस्थांमधून बोलले जात आहे.

मुंबईकरांनो, आरोग्य सांभाळा!

लोकमत पनवेल कार्यालयाचे आज उद्घाटन

मतदारांमध्ये निरुत्साह

घोलवड केंद्रात रुग्णांचे हाल

डहाणूत दोन वर्षांपासून रॉकेलटंचाई

पुतण्याने केली काकाची हत्या

३५,२६० कर्मचारी तैनात

मुंब्रा : मतांच्या विभाजनामुळे कळव्याला महत्त्व

ऑक्टोबर हिटचा प्रचाराला फटका

मध्य रेल्वेचेही प्रवासी लटकले

धावपळ-टेन्शन वाढण्याची ‘चिन्हे’

वादळी पावसाचा तडाखा