मराठी मुलगा पडला सगळ्यांवर भारी! रोहित राऊत 'I Popstar' चा विजेता झाल्यानंतर पत्नीची खास पोस्ट, म्हणाली-"तुझी मेहनत..."

रोहित राऊत ठरला भारताचा पहिला आय-पॉप स्टार! नवऱ्याच्या यशानंतर भारावली पत्नी, म्हणाली...

Juilee Joglekar Post For Rohit Raut: गेल्या काही महिन्यांपासून सोशल मीडियावर I-Popstar या सिंगिग रिअॅलिटी या शोची जोरदार चर्चा सुरु आहे. या कार्यक्रमातील प्रत्येक स्पर्धकाने आपल्या सुरांच्या जादूने गायन रसिकांच्या मनावर मोहिनी घातली.  याच कार्यक्रमात मराठमोळा गायक रोहित श्याम राऊत देखील सहभागी झाला होता.आय-पॉपस्टारच्या मंचावर त्याने सादर केलेले 'रोअर ऑफ सह्याद्री' हे गाणं तुफान व्हायरल झालं. छत्रपती शिवाजी महाराजांविषयीचं हे गाणं त्याच्या चाहत्यांनी अक्षरश: डोक्यावर उचलून धरलं आहे.शिवाय या पर्वाच्या ट्रॉफिवरही त्याने आपलं नाव कोरलं. त्यामुळे संपूर्ण महाराष्ट्रातून त्याच्यावर शुभेच्छांचा वर्षाव होताना दिसतोय. अशातच रोहितच्या यशानंतर त्यांनी पत्नी जुईलीने सोशल मीडियावर शेअर केलेली पोस्ट चर्चेचा विषय ठरली आहे. 

१८ ऑक्टोबरपासून सुरू झालेल्या या शोमध्ये किंग, आस्था गिल, आदित्य रिखारी आणि परमिश वर्मा हे गायक परिक्षकाच्या खुर्चीत बसलेले पाहायला मिळाले.विविध भाषांमध्ये गाणारे स्पर्धक या मंचावर सुंदर पद्धतीने गाणी सादर करताना दिसले. या कार्यक्रमातून मराठमोळा गायक रोहित राऊत पुन्हा एकदा रिअॅलिटी शो गाजवला आणि ट्रॉफी आपल्या नावावर केली. यानंतर रोहितसाठी त्याची पत्नी जुईलीने सोशल मीडियावर खास पोस्ट शेअर करत त्यांचं तोंडभरून कौतुक केलं आहे. 

बायकोला नवऱ्याचं कौतुक...

जुईलीने आपल्या अधिकृत इन्स्टाग्राम अकाउंटवर आपल्या नवरोबाचं कौतुक करत म्हटलंय,"आज मला तुझा किती अभिमान वाटतोय हे मी शब्दातही सांगू शकत नाही. मी तुझा आय-पॉपस्टारचा संपूर्ण प्रवास पाहिला आहे. समर्पण,रात्र-रात्र जागणं, तु तू तुझ्यातील कौशल्यांना वाव दिला. ती प्रत्येक गोष्ट दिसून येत आहे आणि त्याचा खरोखरच फायदा झाला. मला अजूनही आठवतंय फिनालेच्या शेवटच्या आठवड्यात तुझी बरीच गाणी नाकारली गेली होती.पण आज तुझा तो शेवटचा परफॉर्मन्स...खूपच कमाल! तू फक्त सादरीकरण केले नाहीस, तर त्या स्टेजवर तुझा ताबा होता."

पुढे जुईने म्हटलंय, "हा विजय खूप योग्य आहे आणि कायम आठवणीत राहणारा आहे. मी तुझा संघर्ष पाहिला आहे, तुझे कठोर परिश्रम पाहिले आहेत आणि आज तुझं यशही पाहते आहे. तुझा खूप अभिमान आहे. असाच पुढे जात राहा ही तर फक्त सुरुवात आहे." अशी पोस्ट लिहून नवऱ्याचं यशाचा आनंद सेलिब्रेट केला आहे.