सिनेसृष्टीतून एक धक्कादायक आणि दु:खद बातमी समोर येत आहे. प्रसिद्ध अभिनेत्याचा मृत्यू झाला आहे. मल्याळम अभिनेता कलाभवन नवास यांचं निधन झालं आहे. ते ५१ वर्षांचे होते. कोचीमधील चोट्टानिक्कारा येथील एका हॉटेलमधील रुममध्ये ते मृतावस्थेत आढळले. त्यांच्या मृत्यूचं कारण अद्याप समोर आलेलं नाही. पण, हृदयविकाराच्या झटक्याने त्यांचा मृत्यू झाल्याचा संशय व्यक्त करण्यात येत आहे.
पीटीआयने दिलेल्या वृत्तानुसार, कलाभवन त्यांच्या एका सिनेमाच्या शूटिंगसाठी हॉटेलमध्ये थांबले होते. ते शुक्रवारी तिथून निघणार होते. पण, बराच वेळ त्यांनी चेक आऊट केलं नाही. त्यामुळे हॉटेल स्टाफने त्यांच्या खोलीचा दरवाजा ठोठवला. परंतु खूप वेळ झाला तरी दरवाजा न उघडल्याने खोलीचा दरवाजा उघडण्यात आला. तेव्हा कलाभवन हे बेशुद्ध अवस्थेत आढळले. त्यांना तातडीने उपचारांसाठी रुग्णालयात घेऊन जाण्यात आलं होतं. मात्र डॉक्टरांनी त्यांना मृत घोषित केलं. त्यांचा मृतदेह शवविच्छेदनासाठी पाठविण्यात आला आहे. त्यानंतरच त्यांच्या मृत्यूचं खरं कारण कळू शकेल.
कलाभवन हे अभिनेता असण्यासोबतच उत्तम मिमिक्री आर्टिस्टही होते. त्यांच्या भूमिकांनी प्रेक्षकांच्या मनावर छाप पाडली. १९९५ मध्ये चैतन्यम या सिनेमातून त्यांनी अभिनयातील कारकीर्दिला सुरुवात केली होती. त्यानंतर मिमिक्स अॅक्शन ५००, हिटलर ब्रदर्स, चंदामामा, ज्युनियर मंड्रेक, तिल्लाना तिल्लाना अशा सिनेमांमध्ये त्यांनी काम केलं. काही टीव्ही शोमध्येही ते दिसले होते. त्यांच्या निधनाने सिनेसृष्टीवर शोककळा पसरली आहे.